Bu gün Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun  (KİVDF) 2016-cı il Novruz Bayramı münasibətilə elan etdiyi fərdi jurnalist müsabiqəsinin qaliblərinin mükafatlandırılması mərasimi keçirilib.
Unikal.org xəbər verir ki, tədbirdə Azərbaycan Prezidentinin İctimai-siyasi məsələlər üzrə köməkçisi Əli Həsənov, media qurumlarının rəhbərləri, müxtəlif dövlət qurumlarının nümayəndələri, millət vəkilləri və digər qonaqlar iştirak ediblər.
Tədbiri giriş sözü ilə açan KİVDF-nin icraçı direktoru Vüqar Səfərli media nümayəndələrini qarşıdan gələn Novruz bayramı münasibətilə təbrik edib, onlara yeni yaradıcılıq uğurları arzulayıb.
Fondun icraçı direktoru Vüqar Səfərli deyib ki, müsabiqə 2016-cı il yanvarın 28-dən martın 4-dək, Kütləvi İnformasiya Vasitələrinin İnkişafına Dövlət Dəstəyi Konsepsiyasında əksini tapmış 15 istiqamət üzrə keçirilib. Müsabiqəyə 62 kütləvi informasiya vasitəsindən 155 yazı təqdim edilib, yazılar 12 ekspert tərəfindən qiymətləndirilib. Müzakirələrin yekununda müsabiqənin şərtlərinə uyğun olaraq, 15 istiqamətin hər biri üzrə 6 yazı müəllifi qalib elan edilib, ümumilikdə 90 nəfər jurnalistin mükafatlandırılması haqqında qərar qəbul olunub. Müsabiqənin şərtlərinə əsasən, hər istiqamət üzrə I yerin qaliblərinə 500, II yerlər üçün 400, III yerlər üçün 300 manat mükafatın verilməsi nəzərdə tutulub.
Azərbaycan prezidentinin ictimai-siyasi məsələlər üzrə köməkçisi Əli Həsənov isə çıxışında jurnalistlərə uğurlar arzulayıb: "Mövcud vəziyyətdə bəzi problemlər mediamıza, jurnalistlərimizə də təsir göstərir. Ancaq bilin ki, hər şey Azərbaycan prezidentinin, hakimiyyətinin nəzarətindədir, media diqqətdən kənarda qalmayacaq. İnsan həyatının xoşbəxtliyi ayrı-ayrı xoş məqamların cəmləşməsidir. Hər bir insan problemlərinin həllini birinci növbədə dövlətdən gözləyir, dövlət də vətəndaşlarının firavan həyat qurmasına çalışır. Azərbaycan prezidenti İlham Əliyev də bütün çıxışlarında  bildirir ki, məqsədimiz hər bir vətəndaşa layiqli həyat təmin etməyə nail olmaqdır. Jurnalistlərə qayğı ənənəsinin əsasını Heydər Əliyev qoyub".
Ə.Həsənov sonda qalib jurnalistləri təbrik edib.

Sonra isə müsabiqə qalibləri mükafatlandırılıb və tədbir musiqi proqramı ilə davam etdirilib.