Səpin ərəfəsində Kənd Təsərrüfatı Nazirliyinin, pambıqçılıq rayonlarının Dövlət Aqrar İnkişaf Mərkəzlərinin, pambıq tədarükü və emalı şirkətlərinin iştirakı ilə çoxsaylı görüşlər keçirilib, sahənin inkişafı ilə bağlı hədəflər müəyyənləşdirilib, onların həlli məqsədilə Nazirliyin müvafiq qurumları tərəfindən tədbirlər planı hazırlanıb, bu tədbirlərin aidiyyəti üzrə icraçıları və müddətləri müəyyən edilib. 

"Unikal" xəbər verir ki, aprelin 17-dək respublika üzrə pambıq emalı və tədarükü şirkətləri tərəfindən 15434 mülkiyyətçi ilə 92 min hektar sahədə pambıq istehsalı məqsədilə müqavilə bağlanılıb və həmin sahələrin 90 min hektarında şum işləri aparılıb. Müqavilələrin bağlanması prosesi davam edir. 

Aprelin ikinci ongünlüyündə pambıq tarlalarında çiyid səpininə başlanılıb və artıq 17.7 min ha sahədə səpin həyata keçirilib. 

Nazirliyin əməkdaşları ölkənin aparıcı pambıqçılıq rayonlarından olan Sabirabadda çiyid səpininin gedişi ilə tanış olublar. 

Bu il Sabirabad rayonunda pambıq emalı və tədarükü şirkətləri 2655 fermer ilə 11400 hektar sahədə pambıq əkininə dair müqavilə imzalayıblar. Əkin aparılacaq bütün sahələrdə şum işləri artıq başa çatıb və 2.0 min hektara yaxın sahədə isə çiyid səpini həyata keçirilib.

Qeyd edək ki, 2022-ci il pambıqçılıq mövsümündə sahələrdən 322300 ton pambıq yığılaraq tədarük məntəqələrinə təhvil verilib. Pambıq üzrə orta məhsuldarlıq 30,92 sent/ha təşkil edib ki, bu da bir il əvvəlki mövsümlə müqayisədə 2,42 sent/ha artıqdır. 2022-ci ildə bir il əvvəllə müqayisədə sahələrdən 35259 ton artıq məhsul yığılıb. 

Azərbaycanda pambıqçılığın inkişafı dövlət tərəfindən dəstəklənir.  Aqrar Subsidiya Şurasının qərarına əsasən, 2022-ci ildə tədarük məntəqələrinə təhvil verilən pambığın hər tonuna görə fermerlərə 170 manat məhsul subsidiyası ödənilib. Şuranın qərarı ilə 2023-cü il mövsümündə fermerlərə təhvil verəcəkləri pambığın hər tonuna görə 180 manat məhsul subsidiyası ödəniləcək. 

2022-ci ildə pambıq tədarükü və emalı müəssisələri məhsulun fermerlərdən alış qiymətinin artırılmasına dair iki dəfə qərar qəbul ediblər. Xam pambığın alış qiyməti hər tona görə mövsümün əvvəlində 50 manat və yığım ərəfəsində də 50 manat olmaqla ümumilikdə 100 manat artırılıb. 

2022-ci ildə pambığın fermerlərdən alış qiyməti 1-ci növ üçün 800 manat, 2-ci növ üçün 780 manat, 3-cü növ üçün 740 manat, 4-cü növ üçün 700 manat olartaq müəyyənləşib.