Hər zaman şəhidlərimizin ailə üzvlərinin, qazilərimizin sosial müdafiəsi və ehtiyaclarının qarşılanması üzrə təşəbbüslərdə aktiv iştirak edən "TuranBank" bu ənənəyə sadiq qalaraq “YAŞAT” Fondunun, “ASAN Könüllüləri” Təşkilatının, “Neftçi” Peşəkar Futbol Klubunun təşkilatçılığı və Azərbaycan Respublikası Dövlət Neft Şirkətinin (SOCAR) tərəfdaşlığı ilə həyata keçirilən “V Neftçili Yay Futbol Düşərgəsi”nə maliyyə dəstəyi göstərib.

"Unikal" xəbər verir ki, 16 – 25 iyun tarixlərində Bakı şəhərində baş tutacaq, Ümummilli lider Heydər Əliyevin 100 illik yubileyinə həsr olunan düşərgənin açılış mərasimində “YAŞAT” Fondunun rəhbəri, Qarabağ qazisi Elvin Hüseynov, “Neftçi” PFK-nın Müşahidə Şurasının üzvü, veteran futbolçu Səməd Qurbanov, "TuranBank"ın İdarə Heyətinin sədri Fəzail Musayev və digər qonaqlar iştirak ediblər.

Düşərgə şəhidlərimizin 6-12 yaş aralığındakı övladlarından ibarət 100 iştirakçını əhatə edir. Layihənin əsas məqsədi gənclərin fiziki sağlamlıqlarının və idmana olan maraqlarının artırılması, yeni bilik və bacarıqlar əldə etmələrinə dəstək olmaq, eyni zamanda onların asudə vaxtlarının səmərəli təşkilidir.

Açılış mərasiminin ardından "TuranBank"ın dəstəyi ilə iştirakçılara xatirə hədiyyələri təqdim edildi və həmçinin idman yarışları, “Neftçi” futbol klubu ilə tanışlıq, əyləncə saatı təşkil olundu. Ümumilikdə tədbirin davam edəcəyi 9 gün ərzində müxtəlif yarışlar, tanınmış idmançılarla görüşlər, ustad dərsləri, ekskursiyalar və əyləncə saatları təşkil olunacaq.

Qeyd edək ki, "TuranBank" Korporativ Sosial Məsuliyyət proqramı çərçivəsində həssas əhali qruplarını, o cümlədən gələcəyimiz olan uşaqları daim diqqət mərkəzində saxlayır və dəstək olur. Bundan sonra da Bankımız "YAŞAT" Fondu ilə birlikdə mütəmadi olaraq sosial layihələrdə əməkdaşlıq edərək şəhid ailələrinin sosial təminatına dəstəyini davam etdirəcək.