Qəbələ rayon icra başçısının I müavini Abil Ağasəfərov bir qrup Qəbələ sakininin erməni tərəfinə keçmək istəklərini təkzib etsə də Daxili İşlər Nazirliyinin mətbuat xidmətinin rəis müavini Ehsan Zahidov  faktı təsdiqləyib.
"Fevralın 27-də Qəbələ sakinləri - aralarında azyaşlıların da olduğu bir qrup Ağdamın Mirbəşirli kəndinə gəliblər və məhkəmənin hökmü ilə məhkum olunmuş qohumlarının azadlığa buraxılmayacağı təqdirdə təmas xəttini keçəcəklərini bildiriblər. Həmin vətəndaşlar hüquq-mühafizə orqanlarının əməkdaşları tərəfindən saxlanılıblar".
E.Zahidov deyib ki, polis bölməsində sakinlərin izahatı alınıb:
"Rayon Polis Şöbəsində onların hər birindən izahat alınıb, söhbət aparılıb. Şəxslər dərhal gəldikləri Qəbələ rayonuna yola salınıblar. Hazırda araşdırma aparılır. Araşdırmaların nəticəsindən asılı olaraq məsələyə hüquqi qiymət veriləcək".
Məlumat üçün bildirək ki, 25 nəfər Qəbələ sakini əllərində ağ bayraqla işğal altındakı Ağdam rayonuna keçərkən polis onları mühasirəyə alıb. Bildirilir ki, həmin 25 nəfər Nəbiyevlər ailəsinin Qəbələdə onlara qarşı etdiyi haqsızlıqlardan dolayı bu addımı atıblar.