Rusiya prezidentinin mətbuat katibi Dmitri Peskov ABŞ-da Moskvanın ünvanına səslənən ittihamlara növbəti dəfə cavab verib.

Unikal.org-un "İnterfaksa istinadən verdiyi məlumata görə, D. Peskov bildirib ki, Rusiyaya hər gün ABŞ ərazisindən haker hücumları olur: "ABŞ ərazisindən həyata keçirilən haker hücumları gündəlik qeydə alınır. Rusiya prezidentinin saytına da hücumlar edilir. Lakin biz bunun arxasında rəsmi Vaşinqtonun dayandığını söyləməklə insanları güldürmək istəmirik.

D. Peskov deyib ki, hər hansı ölkədən həyata keçirilən hücumlar o demək deyil ki, bunun arxasında həmin dövlət dayanır. Bununla yanaşı, Putinin sözçüsü qeyd edib ki, Kremldə başqa dövlətlərin Rusiyanın daxili işlərinə müdaxiləsini təsdiqləyən faktlar var.