Bu gün Bakı Ağır Cinayətlər Məhkəməsində "Azərbaycan Dövlət Televiziya və Radio Verilişləri" QSC-nin sədri Arif Alışanovu öldürməyə cəhddə, ona qarşı dələduzluq etməkdə və digər cinayətlərdə təqsirləndirilən Şücayət Əkbərov, Qoçalı Cəbiyev, Zöhrab Şirinov və Aqşin Hüseynovun barəsində olan cinayət işi üzrə məhkəmə prosesi davam etdirilib.

Unikal.org-un məlumatına görə, hakim Əfqan Hacıyevin sədrliyi keçirilən prosesdə şahid qismində Rövşən Eynalov ifadə verib.

O bildirib ki, hadisə ilə bağlı saxlanılan avtomobil Şamaxı Rayon Polis Şöbəsinə gətirilib. Şahid avtomobilin kimə məxsus olduğunu bilmədiyini deyib.

Digər şahid Samux Rayon İcra Hakimiyyətinin əməkdaşı Ülvi Mirzəyev bildirib ki, Samuxda Ş. Əkbərovun qızı üçün tikilib: "Evin tikilməsi üçün Şücayət Əkbərov sifariş verib və materiallar Şücayət və Ələddin tərəfindən alınıb. Evin tikintisinə təxminən 80 min manata yaxın pul xərclənib. Həmçinin evin tikilməsi üçün torpaq sahəsi Şücayət Əkbərovun qızı Cəmiləyə icra başçısı tərəfindən hədiyyə olunub. Həmin mənzil Şücayət Əkbərovun qızı üçün tikilib".

Qismət Abışov bildirib ki, traktor almaq üçün zərərçəkmiş Dəyanət Cəfərov tərəfindən pul ödənilib. Şahid diqqətə çatdırıb ki, həmin pulla alınan texnikanı şəxsi təsərrüfatı üçün işlədib: "Şücayətin də, mənim də adıma alınan traktorların pulunu Dəyanət Cəfərov verib".

Ş. Əkbərov isə buna etiraz edərək, özünün adına alınan traktorun pulunu ödədiyini deyib.

Şamaxı rayon Mədrəsə kəndinin Bələdiyyə sədri Asim Bayramov ifadəsində deyib ki, özünə məxsus 12 sot torpaq sahəsini Ş. Əkbərova 5 min manata satıb.

Zərərçəkmiş Dəyanət Cəfərov isə qeyd edib ki, həmin kənddə 50 hektar sahəni Ş. Cəfərov ona 80 hektar adı altında satıb.

Prosesdə təqsirləndirlən Ş. Əkbərovla digər təqsirləndirilən Aqşin Hüseynov arasında mübahisə düşüb, onlar bir-birlərini təhqir ediblər. Buna görə A. Hüseyov zaldan çıxarılıb.

Sonra şahid Habil Bayramov ifadə verib. O isə çıxışında özünə məxsus 4 hektar torpaq sahəsini 2 min manata Aqşin Hüseynova satdığını bildiirb.

Daha sonra prosesdə iki şahid dindirilib. Məhkəmə şahidlərin ifadəsində ailə sirri olduğuna görə, proses qapalı keçirilib.

Qeyd edək ki, təqsirləndirilən şəxslər Cinayət Məcəlləsinin 29,120-ci (qəsdən adam öldürməyə cəhd), 178-ci (dələduzluq) və digər maddələrinə əsasən ittiham olunurlar.