Türkiyə ordusu yenidən şəhid verib.

Unikal.org-un Anspress-ə istinadən məlumatına görə, Diyarbakırın Licə qəsəbəsində davam edən əməliyyatlar zamanı terrorçularla baş verən atışma zamanı ordunun iki əsgəri ağır yaralanıb. Yaralı hərbçilər dərhal xəstəxanaya çatdırılsalar da, onların həyatını xilas etmək mümkün olmayıb. Hər iki əsgər xəstəxanada dünyasını dəyişib.

Türkiyənin ordusunun baş qərargahından məlumat təsdiqlənib və bildirilib ki, bölgədəki terrorçuların zərərsizləşdirilməsi üçün həyata keçirilən genişmiqyaslı əməliyyatlar davam etdirilir.

İki gün əvvəl də Türkiyə günə şəhid xəbərləri ilə başlayıb. Antiterror əməliyyatları keçirilən Mardin əyalətində PKK terroçuları hərbi maşını atəşə tutub. Mardinin Derik rayonuna bağlı Soğukkoyu kəndinə əməliyyatlar üçün gedən hərbçi dolu avtomobilə terrorçular hücum edib. Hadisə nəticəsində iki hərbçi şəhid olub.

Hakkaridə isə PKK terrorçuları ilə təhlükəsizlik qüvvələri arasında atışma baş verib. Hakkari-Çukurca magistral yolunda yola quraşdırılan bombanın aşkarlanaraq zərərsizləşdirilməsindən sonra bölgədə əməliyyatlar başlayıb. Tələ quran PKK terrorçuların açdığı atəş nəticəsində 4 hərbçi dünyasını dəyişib.

Həmin hadisədən bir gün əvvəl də Mardində bomba yüklü avtomobil Jandarma məntəqəsinin yaxınlığında partladılıb.

Patlayış nəticəsində hadisə yerinin yaxınlığından keçən TIR sürücüsü və ikisi dinc sakin olmaqla 5 nəfər yaralanıb. Yaralananlar arasında polislərin də olduğu bildirilirdi. Terror aktı PKK silahlıları tərəfindən törədilib.

Avtomobil uzaqdan idarə olunan bomba ilə partladılıb. Xəsarət alan şəxslər xəstəxanalara çatdırılıb. Yük avtomobilinin sürücüsü Ömərli Dövlət Xəstəxanasına çatdırılsa da, onun həyatını xilas etmək mümkün olmayıb.