“Yalnız Hafiz Hacıyev deyil, başqa namizədlər də debatda özlərini apara bilmirlər”
“Yalnız Hafiz Hacıyev deyil, başqa namizədlər də debatda özlərini apara bilmirlər”

Prezident Administrasiyasının Ictimai-siyasi məsələlər şöbəsinin müdiri Əli Həsənov İTV-də debat zamanı prezidentliyə namizədlər arasında baş verən davaya münasibət bildirib.O,qeyd edib ki, prezidentliyə namizədlərin hərəkətləri, davranışları, işlətdikləri ifadələr, özlərini aparmaları, bir-birilərinə münasibəti nümunə olmalıdır.
Onların hər biri Azərbaycanı idarə etmək iddiasında olan, bunun üçün çalışan insanlardır. Ona görə də prezidentliyə namizədlər davranış qaydalarına əməl etməlidirlər, xalq onlardan bunu gözləyir.
Hər halda İTV-dəki məsələ namizədlər arasında baş verən prosesdir. Hakimiyyət buna müdaxilə etmək niyyətində deyil. Bizim belə bir fikrimiz yoxdur:-“ Hakimiyyət nümayəndəsi olaraq prezidentliyə namizədlərin hər hansı hərəkət və davranışı haqda fikir bildirmək, rəy vermək istəmirəm. Çünki bu, istənilən halda yaxşı yozulmayacaq. Amma prezidentliyə namizədlərin oradakı hərəkətlərinə nəzər salsanız görərsiniz ki, yalnız Hafiz Hacıyev deyil, başqalarının da davranışlarında, debatda özlərini aparmalarında müəyyən qüsurlar var.Bütövlükdə götürəndə baş verənlər seçki prosesi üçün xoşagələn hal deyil. Bu, Azərbaycanın imici üçün yaxşı hal sayıla bilməz. İnsanlar televiziya qarşısında oturur və prezidentliyə namizədlərin çıxışlarını gözləyir. Vətəndaşlar qarşıdakı illərdə onları nələr gözlədiyini, hansı alternativ layihələrin, təkliflərin olduğunu öyrənmək istəyirlər. İnsanlar namizədlərdən konkret təklif, layihə, inkişafa xidmət edən ideyalar gözləyirlər. Amma onların televiziyada qarşılıqlı şəkildə ittihamlarla çıxış etmələri, bir-birilərinə qarşı təsdiqini tapmamış kompromatlar irəli sürmələri, belə kompromatlarla günahlandırmaları ilə rastlaşanda vətəndaşlar bunu yaxşı qarsalamırlar, məyus olurlar.Kimin nə deməsindən asılı olmayaraq Azərbaycanda hazırkı seçki prosesi və durum tam normalıdır, dünya standartlarına uyğundur, azad, ədalətli, demokratik seçki keçirilməsinə imkan verir. Mərkəzi Seçki Komissiyası, o cümlədən dairə və məntəqə seçki komissiyaları seçkiyə hazırlığı başa çatdırıblar. Hakimiyyət olaraq biz üzərimizə düşən bütün məsələləri həll etmişik, yaxud da həmin işləri yekunlaşdırmaq üzrəyik. Azərbaycanda seçkiqabağı mühit tam şəffafdır, demokratikdir, namizədlər arasında bərabər yarış imkanları mövcuddur. Kimin nə deməsindən asılı olmayaraq biz prezident seçkisi ilə bağlı qanunvericiliklə tələb olunan bütün prosesləri, məsələləri həyata keçirmişik, yaxud da keçirib yekunlaşdırmaq üzrəyik. Ona görə də biz qətiyyən narahat deyilik. Amma ortaya belə müəyyən hallar çıxır və onlar bütövlükdə seçkinin imicinə xələl gətirir”.
Mahir