Ramiz Həsənov bəzi oliqarxlara qarşı güclənir

Ramiz Həsənov bəzi
oliqarxlara qarşı güclənir
Komitə sədri əlindəki "nəzarət gücü"nü artırır

Ramiz Həsənovun sədri olduğu Standartlaşdırma, Metrologiya və Patent üzrə Dövlət Komitəsinin əmri ilə qanunvericiliyin tələbinə əsasən genetik modifikasiya olunmuş bitkilərin, yaxud müasir biotexnoloji və gen mühəndisliyi metodları ilə yaradılmış kənd təsərrüfatı bitki materiallarının və ya genetik modifikasiya olunmuş bitkilərin genetik materiallarından istifadə edilərək istehsal olunan yeyinti məhsullarının qanunsuz dövriyyəsinin qarşısının alınması və istehlakçıların hüquqlarının qorunması məqsədilə bir sıra zəruri tədbirlərin görülməsi qərara alınıb.
Komitədən verilən məlumata görə, belə ki, yeni hazırlanan standartlaşdırma üzrə normativ sənədlərdə yeyinti məhsullarının istehsalında genetik modifikasiya olunmuş bitkilərin genetik materiallarından istifadəsinin qadağan edilməsi ilə bağlı tələblər əks olunacaq. Hazırda yeyinti məhsullarının istehsalı zamanı genetik modifikasiya olunmuş bitkilərin genetik materiallarından istifadə olunmamasını göstərən qablaşdırma və nişanlama üzrə tələbləri müəyyən edən standartlar hazırlanır və mövcud sənədlərə dəyişikliklər edilir.
Həmçinin MDB Standartlaşdırma, Metrologiya və Sertifikatlaşdırma üzrə Dövlətlərarası Şuranın qəbul etdiyi, Azərbaycanda standartlaşdırma üzrə normativ sənəd kimi qüvvədə olan, lakin qanunvericiliyə zidd olan dövlətlərarası standartların hüquqi qüvvəsinin ləğv edilməsi məqsədilə Komitədə işlər görülməkdədir.
Əmrə əsasən komitə yanında Dövlət Akkreditasiya Xidməti akkreditasiya olunmuş sertifikatlaşdırma qurumları və sınaq laboratoriyaları üzərində nəzarət tədbirlərini gücləndirib. Belə ki, bundan sonra yeyinti məhsullarını sertifikatlaşdıran orqanlar məhsulların tərkibində genetik modifikasiya olunmuş bitkilərin genetik materiallarının olmadığını sübut edən sınaq nəticələri əsasında sertifikatlaşdırma işlərini apara bilər. Əks təqdirdə qanunvericiliyin tələblərini pozmaqla uyğunluq sertifikatı verən qurumların akkreditasiya attestatı ləğv ediləcək və qanunvericiliklə nəzərdə tutulmuş digər tədbirlər görüləcək.
Komitə yanında Texniki Tənzimləmə və Standartlaşdırma üzrə Dövlət Nəzarəti Xidmətinə yeyinti məhsulları ilə əlaqədar yoxlamaların aparılması zamanı genetik modifikasiya olunmuş bitkilərin genetik materiallarından istifadənin qadağan olunması ilə əlaqədar qanunvericiliyin və standartlaşdırma üzrə normativ sənədlərin tələblərinə riayət olunmasına nəzarəti gücləndirmək və pozuntularla əlaqədar cinayət əlamətləri aşkar edildiyi halda toplanmış materialların hüquq mühafizə orqanlarına göndərilməsi tapşırılıb.
Məlumat üçün bildirək ki, "Yeyinti məhsulları haqqında" Qanunun 9-cu maddəsi ilə yeyinti məhsullarının istehsalında genetik modifikasiya olunmuş bitkilərin genetik materiallarının istifadəsi qadağan olunub.
"Azərbaycan Respublikasının Cinayət Məcəlləsində dəyişikliklər edilməsi haqqında" Azərbaycan Respublikasının 28 aprel 2015-ci il 1266-IVQD nömrəli Qanununa əsasən elmi tədqiqat, sınaq və sərgilərdə nümayiş məqsədləri üçün nəzərdə tutulmayan genetik modifikasiya olunmuş bitkiləri, yaxud müasir biotexnoloji və gen mühəndisliyi metodları ilə yaradılmış kənd təsərrüfatı bitki materiallarını və ya genetik modifikasiya olunmuş bitkilərin genetik materiallarından istifadə edilərək istehsal olunan yeyinti məhsullarını istehsal etmə və həmçinin istehsal olunmuş məhsulları xeyli miqdarda bilə-bilə idxal etmə və ya satma üçün cinayət məsuliyyəti müəyyən olunub.
Bir sözlə, Ramiz Həsənov GMO-larla bağlı əlindəki mövcud "nəzarət gücü"nü artırır. Bu eyni zamanda adıçəkilən komitə sədrinin oliqarxlara qarşı güclənməsi deməkdir.
Məsələ burasındadır ki,KİV geni dəyişdirilmiş məhsulların böyük hissəsinin ölkəmizə ayrı-ayrı oliqarxların nəzarəti altında gətirildiyi barədə mütəmadi olaraq yazır. Məhz bu səbəbdən də hökumət GMO-lara qarşı müəyyən sərt addımlar atmağa çalışsa da, bu, əksər hallarda praktikada reallaşmır. Səbəb də məhz bəzi iri məmurların əllərindəki təsir rıçaqlarından istifadə edərək milyonlarla manat gəlir əldə etdikləri bu cür məhsulların Azərbaycana gətirilməsinə və onların satışına qarşı qanuni əngəllərə saymazyanalıq nümayiş etdirməsi ilə bağlıdır.
Bununla belə, Ramiz Həsənovun sözügedən problemin həllinə qarşı öz nəzarət və icra imkanlarını artırması xalqımıza yönəlmiş "GMO təhlükəsinin" aradan qaldırılması istiqamətində müəyyən ümidlər vəd edir. Amma hər halda tələsməyək. Necə deyərlər, yaşayarıq, görərik.
Elvin