“Meksika ilə sərhəddə səddin tikintisinə dair Konqreslə yaranan fikir ayrılığı səbəbindən federal hökumətin işinin dayandırılmasına (“shutdown”) gətirib çıxaran büdcə böhranından sonra ABŞ Prezidenti Donald Trampın dəstək reytinqi 40 faizə qədər azalıb. Sorğuda iştirak edən ABŞ vətəndaşlarının 57 faizi Amerika liderinin büdcə böhranından çıxmaq üçün göstərdiyi fəaliyyətlə razı deyil. Bununla yanaşı, rəyi soruşulan Respublikaçılar partiyasının tərəfdarlarının 86 faizi Ağ evin rəhbərini dəstəkləyir. Demokratlar partiyasının eyni sayda tərəfdarı isə büdcə böhranına görə Trampı günahlandırır. Heç bir partiyanı dəstəkləməyən respondentlərin 60 faizi də ABŞ liderinin siyasətini bəyənmir”.

Unikal.org xəbər verir ki, bu, “Politico” qəzetinin apardığı sorğunun nəticəsində öz əksini tapıb.

Məlumata görə, sorğu yanvarın 18-dən 22-dək 1996 amerikalı arasında aparılıb.

Maliyyə vəsaiti ayrılmadığı üçün dekabrın 22-də ABŞ-da federal hökumətin işi qismən dayanıb. Buna Tramp və respublikaçıların Meksika ilə sərhəddə səddin tikintisinə lazım olan 5 milyard dollar vəsaitin büdcəyə daxil edilməsi cəhdləri səbəb olub. Birləşmiş Ştatlar Konqresinin nümayəndələr palatasına nəzarət edən demokratlar isə öz növbəsində federal xəzinədən səddin tikintisinə vəsait ayrılmasına yol verməyəcəklərini bildiriblər.

ABŞ-da bu cür büdcə böhranları əvvəllər də baş verib. Lakin hazırkı böhran müddətinin uzunluğuna görə rekorda imza atıb. Respublikaçılarla demokratların bir-birinə güzəştə gedəcəyi perspektivi isə hələlik inandırıcı görünmür. Artıq doqquz nazirlik, həmçinin bəzi iri dövlət müəssisələri maliyyəsiz qalıb. Ümumilikdə isə “shutdown” hökumət orqanlarının 25 faizinə təsir edib.

Qeyd edək ki, ABŞ Prezidenti Donald Trampın əleyhinə Nümayəndələr Məclisində qanun layihəsi qəbul edilib. Trampın NATO-dan ayrılmaq istəyinə qarşı çıxan Konqres onun NATO-dan çıxmaq barədə qərar verməsini əngəlləyən qanun layihəsini 357 səslə qəbul edib.(modern)