Xəbər verdiyimiz kimi millət vəkili Novruz Aslanov xüsusi rejimli karantin qaydalarını nəzərə alaraq, hər həftə öz seçiciləri ilə telefon vasitəsilə əlaqə saxlayır və onları maraqlandıran məsələləri dinləyir. 

Unikal.org xəbər verir ki, bunun üçün deputatın köməkçisi vasitəsilə müvafiq telefon nömrəsi İsmayıllı rayon sakinlərinə elan edilib. Hər cümə axşamı sakinlər istənilən problem barədə həmin nömrə vasitəsilə deputatla bir başa əlaqə qurur və öz istəklərini çatdırırlar.

Belə müraciətlər əsasında may ayının 21-də Novruz Aslanov İsmayıllı rayonuna növbəti səfərini edib. İsmayıllı şəhərində yerləşən ofisində karantin rejiminin müvafiq tələbləri çərçivəsində, sosial məsafə gözlənilərək, qoruyucu maskadan istifadə edilərək millət vəkili öz seçicilərini qəbul edib. Qəbula gələn hər bir sakin görüşdən öncə qoruyucu maskalarla təmin edilib. Müraciətlər əsasən karantin rejimi dövründə əmək fəaliyyəti ilə məşğul ola bilməyən insanların zəruri qida məhsulları ilə təmin edilməsi və sosial yönümlü məsələlər barədə olub. Deputat bildirib ki, qaldırılan məsələlər qeydiyyata alınıb və əlaqədar qurumlara çatdırılacaq. Bəzi məsələlər yerindəcə həlli edilib. 

Məlumat üçün bildirək ki, ehtiyaclı sakinlərə müntəzəm olaraq ərzaqla yardımlar edilir və belə yardımların paylanılmasında millət vəkili özü də iştirak edir.