"Artıq 4-cü həftədir ki, Əvəz Zeynallı ilə görüşə icazə verilir".
Bunu "Unikal"a açıqlamasında hazırda həbsdə olan Xural TV-nin baş redaktoru Əvəz Zeynallının həyat yoldaşı Məlahət Zeynallı deyib. O bildirib ki, Ə.Zeynallı ilə bağlı istintaq yekunlaşıb:
"Hazırda vəkillər işdə cinayət tərkibinin olmadığına dair vəsatət hazırlayırlar. Hələlik növbəti məhkəmə iclasının vaxtı təyin edilməyib.
Onu da qeyd edim ki, Əvəz Zeynallı saxlanma şəraitindən razılığını bildirir. Heç bir şikayəti yoxdur", - M.Zeynallı deyib.
Xatırladaq ki, Ə.Zeynallı və vəkil Elçin Sadıqov "Baku Still Company" şirkətinin həbsdə olan sabiq rəhbəri Rasim Məmmədovun ailə üzvlərindən külli miqdarda rüşvət almaqda təqsirləndirilir.
Hər iki şəxs Cinayət Məcəlləsinin 311.3.3 (külli miqdarda rüşvət alma) maddəsi ilə təqsirləndirilərək barəsində 4 ay müddətinə həbs qətimkan tədbiri seçilib. Daha sonra E.Sadıqov barəsində ev dustaqlığı qətimkan tədbiri seçilib.
Onu da qeyd edək ki, Əvəz Zeynallı ötən ay Dövlət Təhlükəsizliyi Xidmətinin İstintaq Təcridxanasından Ədliyyə Nazirliyinin Penitensiar Xidmətinin 1 saylı Bakı İstintaq Təcridxanasına köçürülüb.
Murad İbrahimli
.jpg)
