"Bəzi ölkələrin adını daha çox hallandırıb İtaliyanın adını dilə çox gətirməsək də, İtaliya Azərbaycan üçün ən vacib ölkələrdən biridir. Bunun bir çox aydın görülən və görünməyən səbəbləri var".

"Unikal" xəbər verir ki, bunu iqtisadçı ekspert Eldəniz Əmirov deyib. O bildirib ki, Azərbaycan qazandığı hər 100 dollardan təxminən 50 dollarını İtaliyadan əldə edir:

"2023-cü ildə Azərbaycanın 220-dən çox ölkə ilə ticarət aparması nəticəsində ölkəmizə 33,8 milyard dollar vəsait daxil olub ki, bunun 15,2 milyard dolları İtaliyanın payına düşür. Bu, fantastik nisbətdir. Yəni, Azərbaycana 200-dən çox xarici ölkədən daxil olan pulu tərəzinin bir gözünə, təkcə İtaliyadan daxil olan pulu digər gözünə qoymaq olar. Ticarət dövriyyəsinin detallarına gəldikdə isə onun ən yüksək həddi 2008-ci ildə olub. Bunun əsas səbəbi məhz həmin il Azərbaycanın ümumi xarici ticarət dövriyyəsinin bu günə qədər olan tarixi rekord vurması olub. Belə ki, 2008-ci ildə bu dövriyyə 54,9 milyard dolları ötüb. Həmin il İtaliya ilə olan ticarət dövriyyəmiz də tarixin ən yüksək göstəricisi olaraq 19,4 milyard dolları keçib. Bundan sonra 7 il ərzində azalmalara o qədər baş verib ki, 2015-ci ildə İtaliya ilə ticarət dövriyyəmiz 7 dəfəyə qədər azalaraq 2,8 milyard dollara düşüb. Bunun ardında davamlı artım dinamikası nəticəsində 2022-ci ildə iki ölkə arasında 18,1 milyard dollarlıq ticarət edilib.

Ötən il isə bu dövriyyə 2,5 milyard dollar azalaraq 15,6 milyard dollar olub. Lakin burada bir məsələni qeyd edim ki, bu azalma ticarət münasibətlərinin azalması deyildir. Əsas səbəb qaz qiymətlərinin azalmasıdır. Rusiya-Ukrayna müharibəsinə görə 2022-ci ildə hədsiz yüksələn qaz qiymətləri  səbəbindən dövriyyə 18 milyardı keçib, sonrakı ildə qiymətlərin sabitləşməsi səbəbindən 15,6 milyardda qərarlaşıb".

Ekspertin sözlərinə görə, ən əsas məsələlərdən biri idxal və ixrac arasındakı nisbətdir ki, burada da çox böyük müsbət fərq var:  "Dövriyyənin 98 faizini bizim ixracımız təşkil edir. Təbii ki, Azərbaycan da İtaliya üçün çox önəmli ölkədir. İtaliyanın idxalında Azərbaycan Türkiyəni belə qabaqlayaraq 12-ci yerdə qərarlaşıb. Buna görə Cənubi Qafqaz ölkələri ilə apardığı ticarətin 90 faizdən çoxu Azərbaycanın payına düşür. Hazırda Azərbaycanda sənaye, tikinti, ticarət, kənd təsərrüfatı, rabitə, xidmət və digər sahələrdə 100-dən çox İtaliya şirkəti fəaliyyət göstərir. Prezident İlham Əliyevin 2020-ci ilin fevral ayında İtaliyaya dövlət səfəri zamanı “Çoxölçülü Strateji Tərəfdaşlığın gücləndirilməsinə dair Birgə Bəyannamə” də imzalanıb. Bunun nəticəsidir ki, İtaliya şirkətləri işğaldan azad olunan ərazilərdə aktiv fəaliyyət göstərirlər. İtaliya şirkətlərinin gördüyü işlər miqyasına görə Türkiyə şirkətlərindən sonra ikinci yerdədir.  

Cənab Prezidentin İtaliyaya bu səfəri isə heç şübhəsiz ki, ölkələr arası olan siyasi-iqtisadi münasibəti daha da inkişaf etdirəcək. Eyni zamanda iqtisadi münasibətlərdə hökmran olan neft-qaz amilini tədricən əvəzləyəcək yeni istiqamətlər üzrə irəliləyişlər əldə olunacaq".