Nazirin
Nazirin "Topaz biznesi"nin daha bir qurbanı
"Futbol" qumarı bir ananı dilənçiyə çevirdi

"Hər ay dilənçiliklə qazandığım pulların çoxunu televiziya kanallarının birində operator işləyən böyük oğlumun kreditinə verirəm". Bu sözləri aznews.az-a Metronun "Nəriman Nərimanov" stansiyasının yaxınlığında dilənçilik edən və Sabunçuda kirayədə yaşayan 55 yaşlı qadın deyib.
Onun sözlərinə görə, oğlu "Topaz"a pul qoyduğundan borca düşüb, buna görə də bankdan pul götürüb: "Hər ay bankdan mənə zəng vururlar ki, kreditinizi ödəyin. Oğlumu nə qədər danlasam da, xeyri yoxdu. Televiziyadan maaşını alan kimi "Topaza"a qaçıb pul qoyur, mən də onun kreditini ödəyirəm. Hələ üstəlik təsəlli də verir ki, ana, darıxma, oğlanlar var ki, ev-eşiyini satıb pulunu bura qoyur".
Ərindən 14 ildi ki, ayrıldığını deyən qadın kədərli ailə həyatından da söz açıb: "Ərim hər gün içib, məni döyürdü, məcbur olub evdən çıxdım. İndi dilənçiliklə başımı dolandırıram. Kiçik oğluma deyirəm ki, gəl mənimlə kirayədə yaşa. Cavab verir ki, mənim evim var, kirayədə niyə yaşamalıyam? Atası yanıma gəlməyə icazə vermir. Qorxudur ki, ananıza sahib çıxsanız, evdən qovacam. Onlar da evsiz qalacaqlarından qorxub mənə sahib çıxmırlar, amma görüşürük. Arada zəng də vururlar. Keçən dəfə qardaşım oğlu məni tapıb evinə apardı. Həyat yoldaşı onlarla yaşamağıma razılıq vermədi. İndi görün, nə günlərə qalmışam ki, övladım yaşında olan cavanlar məni "dəli" bilərək küçədə ağzıma, üzümə söyürlər".
O, "Sirr deyilsə, gününə nə qədər pul qazanırsınız" sualına "Gün olur ki, heç bir qəpik də yol pulum olmur, ancaq elə gün olur ki, yüz manat qazanıram. Ümumilikdə, hər ay qazancım 1000 manat olur. Onun da 200 manatını kirayəyə verirəm. Qalan pullarımı da oğlum götürür. O da mənə yiyə durmur" cavabını verib.
Metronun "Nəriman Nərimanov" stansiyasının həndəvərində dilənçilik edən qadın yeməyini yaxınlıqda yerləşən kafedə yediyini əlavə edib: "Kafenin sahibi tapşırıb ki, məndən pul alınmasın. Burda şəhid ailələrinə də yemək pulsuz verilir. Axşam da evə gedəndə şirniyyatla çay içib yatıram".
Qadın redaksiyadan xahiş edib ki, onun adı familiyasını yazıda qeyd etməyək və fotosunu yaxından verməyək: "İstəmirəm oğlumun iş yoldaşları ona yuxarıdan aşağı baxsınlar. İstəmirəm, kimsə bilsin ki, anası sahibsiz halda küçələrdə dilənir. Ona görə də nə adımı yazın, nə də şəklimi verin".
Qeyd edək ki, ölkə KİV-lərinin yazdığına görə, yuxarıda danışılan ailə dramına səbəb olmuş "Topaz" gənclər və idman naziri Azad Rəhimovun nəzarəti altındadır. Belə ki, "Topaz"ın idarəedici şirkətinə məhz Rəhimovun yaxın dostu (bəzi mənbələrdə hətta qohumu) olduğu bildirilən şəxs rəhbərlik edir.
Həmçinin vurğulamaq yerinə düşər ki, idman yarışlarına qeyri-leqal pul qoyuluşları ölkədə yüzlərlə insanın bədbəxtçiliyinə - müflisləşməsinə, evini, ailəsini itirməyə gətirib çıxarıb. Və "Topaz" yarananda rəsmilər iddia edirdilər ki, "futbol qumarı"nın leqallaşması ilk növbədə vətəndaşları fırıldaq qurbanı olmaqdan azad edəcək. Amma əvəzində bu gün onlarla insan "futbol qumarı"nın leqallaşması nəticəsində evini, maşınını itirir, borclanır hətta yuxarıdakı şikayətdən də göründüyü kimi, azadlığını itirir, məhbusa çevrilir.
Məsələnin ciddiyyəti hətta bu barədə ölkənin ən ali tribunasından - Milli Məclisdən problemi dilə gətirmək ehtiyacı yaratdı. Xeyli əvvəl Milli Məclisdə ölkədə "futbol qumarı"nı öz əlində cəmləşdirən "Topaz" bukmeker kontoru haqqında sərt tənqidi fikirlər səsləndi. Bəzi deputatlar "Topaz"-ı ailələri dağıtmaqda, vətəndaşları müflisləşdirməkdə günahlandırdılar və onun bağlanmasını tələb etdilər.
Yuxarıdakı ailə dramı bu tənqid və tələblərin haqlılığını bir daha ortaya qoyur
Günel Əkbər