Bakıda məmurların villalarına böyük şok
Salyan şosesində başlayan proses paytaxtın digər yerlərinə də sıçraya bilər
Bir çox məmur və oliqarxların Bakının Səbayel rayonunda, Salyan şosesi, 37 ünvanındakı villalarının söküntüsü prosesi praktiki olaraq başa çatıb.Əməkdaşımız dünən səhər saatlarında söküntü işləri aparılan ərazidə olub və Bakı Şəhər İcra Hakimiyyətinin (BŞİH) həmin əraziyə cəlb etdiyi xüsusi texnikanın məmurların "əziyyətlə" tikib başa çatdırdığı mülkləri necə sökməsini əyani şəkildə izləyib.
Öncə onu qeyd edək ki, dəbdəbəli villaların söküntüsü aparılan ərazidə BŞİH nümayəndələri də vardı. Hər halda həmin şəxslər özlərini meriyanın nümayəndələri kimi təqdim etdilər.Lakin mətbuatla hər hansı ünsiyyətdən qəti şəkildə imtina etdilər. Bundan əlavə, onların mətbuat təmsilçilərinə münasibəti də aqressiv oldu.
"Burada nə işiniz var?! Burada çəkiliş aparmaq olmaz. Biz sadəcə rəhbərliyin göstərişini yerinə yetiririk. Sizə müfəssəl məlumat lazımdırsa, BŞİH-ə müraciət edin. Biz sizə heç nə deməyəcəyik" - deyə söküntü işlərinə rəhbərlik edən "başçı" bildirdi.
Lakin müxbirlər villaların söküntüsü prosesini izləyən yerli sakinlərdən bəzi məlumatlar əldə edə bilib. Onlardan birinin sözlərinə görə, bu villalar dövlət başçısının göstərişinə uyğun olaraq sökülür.
"Bəzilərinin dediyinə görə, bu malikanələr velotrekin görünüşünə mane olur. Digərləri deyir ki, bu villalar qanunsuz tikilib, mülk sahiblərinin heç bir sənədi yoxdur. Bura srağagündən texnika töküblər, həmin gündən söküntü gedir. Bu elitar mülklərin heç birinin sahibi hələ bura gəlməyib, villasının taleyi ilə maraqlanmayıb. Söküntü dünən demək olar ki, tam başa çatıb, amma villa sahiblərindən heç kimi burada görən yoxdur. Yəqin bu villalar həmin adamlardan ötrü xırda şeydir. Görünür, onlar həddən artıq böyük adamlardır, veclərinə də deyil. Biz heç həmin sökülən mülklərin kimə məxsus olduğunu da bilmirik" - deyə sakinlərdən biri bildirib.
Qonşuluqda yaşayan digər sakinin sözlərinə görə, bu ərazidə 1 sot torpağın qiyməti 30 min manatdan başlayır. Heydər Əliyev parkına doğru irəlilədikcə torpağın qiyməti də artır. "Oliqarxlar burada böyük torpaq sahələri almış və villalar tikməyə başlamışdılar. Məsələn, baxın, burada 5 mərtəbəli nəhəng malikanə var idi. Dünən sökdülər. Sahibinin isə heç vecinə də olmadı. Adam bura heç ayağını da qoymadı. Nəyinə lazımdır?! Buradakını sökürlər, gedib başqa yerdə ayrısını tikəcək" - deyə vətəndaşlardan biri başını bulayaraq deyib.
Yeri gəlmişkən, söküntü işləri aparılan ərazidə canlanma və aşkar narahatlıq da hiss olunurdu. Yaxın ərazidə - söküntü zonasının qonşuluğundakı villa və mülklərin sahibləri bura aylarla ayaq basmasalar da dünəndən etibarən gələrək onların da evinin söküntü planına düşüb-düşməyəcəyi ilə maraqlanmağa başlayıblar. Amma artıq bu adamda da belə qənaaət yaranıb ki, onların da evləri buldozerə veriləcək.
Evi olan əraziyə bahalı "Lexus"da gələn lüks malikanələrdən birinin sahibi villasının söküləcəyindən narahat olduğunu etiraf edib. "Bizə bu haqda əvvəlcədən heç bir xəbərdarlıq edilməyib, heç nə deyilməyib. Nə baş verir? Heç kim heç nə bilmir. Qonşuluqdakı villaları sökən inşaatçılardan mənim də evimin plana düşüb-düşmədiyini soruşdum. Onlar da çiyinlərini çəkib dedilər ki, əgər sökməyə göstəriş versələr, sökəcəyik. İndi bilmirəm nə edim. Bura köçüb evimin qarovulunu çəkməkdən başqa əlacım qalmayıb" - deyə villa sahibi çarəsiz durumda qaldığını söyləyib.
«Unikal"ın əldə etdiyi məlumata görə, sözügedən ünvandakı villaların sökülməsi ilə proses yekunlaşmaya da bilər. Belə ki, Bakının digər bir çox yerlərində də (bu sırada xüsusilə paytaxtın Nəsimi, Nərimanov və Binəqədi rayonları ərazisindəki məmur villaları ilə zəngin olan «varlı məhəllələri" göstərilir) oliqarxlara məxsus imarətlərin sökülməsi mümkündür. Bu cür söküntülərin aparılması üçün bir çox səbəblər göstərilə bilər. Həmin sırada onların şəhərin ümumi görünüşünə xələl gətirməsi, qanunsuz inşa edilməsi, strateji dövlət obyektlərinin yaxınlığında inşa edilməsi və yaxud inşa edildikləri ərazilərdən dövlət ehtiyacları üçün istifadə olunması və s. kimi səbəblərin göstərilməsi realdır.
Hər halda Salyan şosesi üzərindəki villaların sökülməsi məmur villalarına qarşı yeni dalğanın başlandığından xəbər verir; son vaxtlar qanunsuz yollarla varlanan vəzifəli şəxslərə qarşı atılan addımlar isə həmin dalğanın da davam edəcəyini ehtimal etmək üçün ciddi əsaslar yaradır.
.jpg)
