Ölkəmizdə boşanma statistikasının acınacaqlı vəziyyətdə olduğu bir dönəmdə boşanmanın yeni orijinal səbəbi yaranıb. İnternet texnologiyalarının inkişafı deyəsən bizim bir çox ailələrimizə heç də yaxşı təsir etməyib. Sosial şəbəkələrin evli kişilərlə yanaşı, qadınların da istifadə profilinə uyğun istifadə olunmaması sonda boşanmaya səbəb olur.

"Qadın Təşəbbüsü və Sosial problemlərin həllinə yardım İctimai Birliyinin sədri Zemfira Mustafayeva Unikal.org- a bildirdi ki, sosial şəbəkələrə insanların çox aludə olması boşanmalarla yanaşı, məişət zorakılığına, sui-qəsd və  intihar hallarına da gətirib çıxarır: "Boşanmaların əksəriyyəti sosial şəbəkələrdə baş verən yazışmalardır. Məsələn gənc qadındır, kimsə ona sosial şəbəkədə dostluq təklif edir və xoş söz deyir və o buna aludə olur. Çünki o ailədə o qayğını görmürsə, qayğı ilə əhatə olunmursa və digər tərəfdən hansısa bir xoş söz deyiləndə və yaxud da kiçik bir məhəbbət etirafı olanda vəziyyət dəyişir.

Z. Mustafayeva  deyir ki, sosial şəbəkələrə aludəçilik ailə qarşısında heç bir öhdəçiliyin yaranmamasına səbəb olur. O, mövzuyla əlaqədar təcrübəsində baş vermiş ailədaxili münaqişələrdən danışdı: "Bu yaxınlarda bir xanımla söhbət etmişəm. Deyir ki, əgər mənə həyat yoldaşım istədiklərimi verə bilmirsə, digər bir insan mənə bunu təklif edirsə, mən niyə həyat yoldaşımı atıb ona getməyim? Görüsünüzmü bizim gənclərin təxəyyülündə nələr formalaşır. Bu insanlar üçün ailənin müqəddəsliyi, ailə dəyərləri çox adiləşib.

Birlik rəhbəri son vaxtlar məhkəmələrə edilən müarciətlərin artdığını və boşanma hallarında əsasən sosial şəbəkələrin çoxluq təşkil etdiyini də qeyd etdi: "Hazırda məhkəmələrə boşanmalarla bağlı müraciət edənlərin əksəriyyəti sosial şəbəkələrin fəsadlarıdır. Bizə yardım almağa gələnlərin əksəriyyəti əsasən bu mövzuda müraciət edirlər. Bu yaxınlarda ailəli bir xanım bizə yazır ki, həyat yoldaşı ona xəyanət edib. Və bir müddət ayrılıblar. Və digər bir insanla yazışıb və o insan da ona xoş sözlər vəd edib. Qadın həmin insanla tanış olublar. Guya aralarında sevgi olub. Sonradan isə ailəsi ilə barışıb. Amma həımin insanı yaddan çıxara bilmir. Hər bir insanını həyatında boşluq ola bilər. Bu narazılıqlar, boşluq olanda əsasən qadınlar kənarda bir məhəbbət axtarırlar. Bu da sonda boşanmalara gətirib çıxarır. Belə nəticəyə gəlmək olar ki, bizim insanlar hələ internet azadlığına hazır deyillər.

Sosioloq Cavid İmamoğlu deyir ki, Azərbaycanda sosial şəbəkələrdən bir çox hallarda məntiqli faydalanmağı bacarmırlar. Xüsusi ilə də "odnoklasnik, "vatsup, "facebook və bu kimi şəbəkələr bir çox hallarda ailədaxili münaqişələrə səbəb olur. Tipik Azərbaycan ailələri üçün sosial şəbəkələr bir çox hallarda baş ağrısı olur: "Çünki, xanımlara və kişilərə sosial şəbəkədə verilən azadlıq da fərqli olur. Sosial şəbəkələrdən istifadə edən qadınlar və ya kişilər anlamalıdırlar ki, hər dostluq göstərənlə dostluq etmək, hər mesaj yazanla danışmaq məcburiyyətində deyillər. Bir çox hallarda sadə "salam, necəsiz xanım? mesajına cavab verən azərbaycanlı xanım əri tərəfindən zorakılığa məruz qalır. Çünki o, yad insanla ünsiyyətdə olub və ailə dəyərlərini alçaldıb. Ümumiyyətlə, ailəli xanımlar, xüsusilə uşaqlı xanımların sosial şəbəkədən davamlı istifadə etməsi məntiqə uyğun deyil. Çünki, ailə və uşağın qayğıları icazə verməz ki, gün ərzində sən sosial şəbəkədəki insanlara və ya tanımadığın insanlara vaxt sərf edib, onların da qayğısına qalasan.

Psixoloq Elnur Ağayev Unikal.org-a şərh etdi ki, sosial şəbəkələr ailə daxili münasibətlərin pozulmasına şərait yaradır: "Ailə mövcuddursa, orda problem ola bilər, narahatçılıq da. Bu ailədən də qaynaqlana bilər, qaynaqlanmaya da. Ola bilsin ki, kişinin atası, yaxud bacısı rəhmətə getsin, içində boşluq olsun. Bunlar olan faktorlardır. Məsələ ondadır ki, bu boşluqları necə doldurulur?! Bu zaman sosial şəbəkələr başlayır dırnaqarası psixoloq rolunu oynamağa. Orda kiminləsə yazışır, söhbət edir. Biri var işgüzar söhbət, biri var mənəvi. Nəticədə emosional bağlılıq yaranır. İnsan özünü qarşı tərəfə borclu hesab edir, onun üçün yaxşı olmağa, onunla ünsiyyətdə olmağa çalışır, onsuz darıxır. Və bütün bunlar zaman keçdikcə ailə daxili münaqişələr, konfliktlər yaratmağa başlayır. Sosial şəbəkələr bu işdə insanları təhrik edir, ailə daxili münasibətlərin pozulmasına rəvac verən funksiyanın yerinə yetirir.

E. Ağayev qeyd etdi ki, insanlar, xüsusən də ailələr diqqətli olmalı, qabaqlayıcı tədbir görmək lazımdır. Söhbət ailədən gedirsə, mövcud problemin həlli yollarından biri sosial şəbəkələrin, mobil telefonların şifrəsi olur: "Bu şifrəni həyat yoldaşlarının bilməsi vacibdir. Ən azından bu tərəflər arasında məsuliyyət, güvən yaradacaq. Yox, əgər kiminsə xislətində xəyanət etmək varsa, o başqa adla sosial şəbəkədə qeydiyyatdan keçəcək və məqsədinə çatacaq. Elə ailələr var ki, qadının ehtiyatdan 1-2 dənə də telefonu var. Kişi evə qalxanda gizlədir. Bu ayrı bir problemdir. Ümumi problemdən danışırıqsa, ailə daxili münasibətlər şəffaf olmalıdır və tərəflərin bir-birinin qarşısında öhdəliyi olmalıdır.