Konkordiya (Monreal, Kanada) Universitetinin tədqiqatçıları müəyyən ediblər ki, pilləkənlərlə qalxmaq baş beynin qocalması prosesini ləngidir. Fiziki fəallığın bu növündən imtina etmək olmaz. Arabir liftə minməyib, piyada qalxmaq daha yaxşı olardı.
Unikal.org-un məlumatına görə, AZƏRTAC "medvesti.com" saytına istinadla xəbər verir ki, Kanada alimləri 19-79 yaş arasında 330 könüllüyə bir neçə mərtəbəni pilləkənlə qalxmağı təklif ediblər. Eksperiment çərçivəsində könüllülərin baş beyni MRT aparatında müayinə edilib və alimlər boz maddənin həcmini ölçüblər. Məlum olub ki, insanlar nə qədər çox piyada gəzib və pilləkənlə qalxıblarsa, baş beyin qocalıqdan bir o qədər çox qorunub. Ona görə də alimlər sinir sisteminin cavan qalması üçün daha çox hərəkət etməyi məsləhət görürlər. İstər yüyürmək, istərsə də fitnes zalında idmanla məşğul olmaq bu işdə yetərlidir. Hətta təmiz havada gəzinti də orqanizmə böyük kömək edər.