Hava Nəqliyyatında Baş Gömrük İdarəsinin əməkdaşları külli miqdarda mobil telefonun qaçaqmalçılıq yolu ilə ölkə ərazisinə gətirilməsinə cəhdin qarşısını alıblar.
Dövlət Gömrük Komitəsinin Mətbuat Xidmətindən Unikal.org-a verilən məlumata görə, mobil telefonların Dubay-Tbilisi-Bakı marşrut xəttindən istifadə edərək qaçaqmalçılıq yolu ilə ölkə ərazisinə gətirilməsi barədə əməliyyat məlumatına əsasən, Tbilisi-Bakı aviareysi ilə gələn Azərbaycan vətəndaşı nəzarətə götürülüb.
Heydər Əliyev Beynəlxalq Hava Limanına daxil olan vətəndaş "Yaşıl kanal" buraxılış sistemindən istifadə edib gömrük nəzarəti zonasından keçərkən gömrük əməkdaşları tərəfindən geri qaytarılıb və "Qırmızı kanal"a yönləndirilib. O, əlindəki sellofan paketi "X-Ray" rentgen aparatına qoyub nəzarətdən keçdikdən sonra gömrük əməkdaşı tərəfindən saxlanılaraq sorğu-sual olunub. Sorğu-sual zamanı vətəndaş üzərində gömrük orqanına mütləq bəyan ediləsi əşyaların olmadığını, sadəcə 2 ədəd mobil telefonunun olduğunu bildirib.
Şəxsi yoxlama zamanı vətəndaşın üzərində aparılması və ya gətirilməsi qanunvericiliklə qadağan olunan, yaxud məhdudlaşdırılan, həmçinin bəyan edilməyən əşyalar aşkar olunmayıb. Əlindəki sellofan paketdə isə 1 ədəd "İphone 7" və 1 ədəd "Samsung" markalı mobil telefonların olduğu müəyyən edilib.
Lakin vətəndaş öz əşyalarını götürüb gömrük nəzarəti zonasını tərk etdikdən sonra əməliyyat tədbirlərinin davam etdirilməsi məqsədilə gömrük əməkdaşları tərəfindən həmin şəxsin gəldiyi aviareysin təyyarəsinə yoxlama keçirilib. Bu zaman təyyarənin sərnişin salonundakı oturacağın alt hissəsində xüsusi qaydada yerləşdirilmiş bir ədəd noutbuk üçün nəzərdə tutulan qəhvəyi rəngli çanta və bir ədəd sellofan paket aşkar olunub.
Həmin çantaya baxış zamanı içərisində 100 ədəd "Samsung Galaxy J3" və 10 ədəd "Samsung Galaxy Prime J5" markalı mobil telefonlar olmaqla, ümumilikdə 110 ədəd mobil telefon aşkar edilib. Sellofan paketin yoxlanılması zamanı isə xüsusi qaydada qablaşdırılaraq qoyulmuş mobil telefon üçün qutular və zəmanət kitabçaları aşkar olunaraq götürülüb.
İlkin araşdırma zamanı əldə edilən videogörüntülərə əsasən, sözügedən vətəndaşın Dubay-Tbilisi aviareysilə Tbilisi hava limanına gələrək tranzit sərnişinlər üçün nəzərdə tutulan zonadan, əlində mobil telefonların yerləşdiyi qəhvəyi rəngli noutbuk çantası və sellofan paketlərlə birlikdə keçdiyi müəyyən edilib. Baxış nəticəsində bu malların eyniləşdirilməsi aparılıb və onların təyyarədə aşkar olunan mallar olduğu yəqinləşdirilib.
Beləliklə, araşdırma dəyəri külli miqdar təşkil edən bu qaçaqmalçılıq cinayətinin qabaqcadan əlbir olmuş bir qrup şəxs tərəfindən törədilməsi nəticəsinə gəlməyə əsas verib. Faktla bağlı Dövlət Gömrük Komitəsinin İstintaq İdarəsində araşdırma aparılır.
