Bu ilin yanvar-avqust ayları ərzində Azərbaycanda 255 qida zəhərlənməsi hadisəsi baş verib. Hadisələr nəticəsində 388 nəfər zərər çəkib.

Bu barədə unikal.org-a Səhiyyə Nazirliyi Respublika Gigiyena və Epidemiologiya Mərkəzindən məlumat verilib.

Məlumatda bildirilir ki, bu ilin 8 ayı ərsində 11 botulizm hadisəsi baş verib. Nəticədə 21 nəfər zəhərlənib, 3 nəfər ölüb. Qida zəhərlənmələrinin hamısı məişət şəraitində hazırlanmış məhsulların qəbulundan baş verib.

Mərkəzdən verilən məlumata görə, təkcə avqust ayında əhali arasında 29 qida zəhərlənməsi baş verib. Bu hadisələrdən 40 nəfər zərər çəkib. Botulizm hadisəsi baş verməyib. Qida zəhərlənməsi hadisələrinin hamısı məişətdə baş verib.