Müdafiə Nazirliyi ötən gün gecə saatlarında təmas xəttinin Tərtər-Ağdərə istiqamətində erməni tankına qarşı İsrail istehsalı olan "Spike" raketinin "uğursuz tətbiqinə" dair qarşı tərəfin yaydığı məlumata münasibət bildirib.

Unikal.org bildirir ki, Nazirliyin mətbuat xidmətinin rəhbəri Vaqif Dərgahlı anspress-ə açıqlama verərək deyib ki, "Spike" hədəfi 100 faiz dəqiqliklə vuran silahdır və ondan yayınmaq heç bir halda mümkün deyil:

"Görünür, bu silah ermənilər üçün çox təəccübləndirici olub. Axı onlar heç vaxt belə dəqiq silah görməyiblər. "Spike" raketinin zərbəsindən tankın qülləsinin qopub kənara uçmasını onlar "qeyri-dəqiq zərbə" kimi qiymətləndirirlərsə, bu, problem deyil. Ermənilər bizim yüksək dəqiqlikli silahlarımızı hələ bundan sonra izləyəcək və hər dəfə təəccüblənəcəklər", - deyə Vaqif Dərgahlı bildirib.