Azərbaycan əhalisinin 97 faizi Prezident İlham Əliyevə tam etibar etdiyini bildirib.
Unikal.org-un məlumatına görə, bunu "Rəy" Monitorinq Mərkəzinin aprelin 18-19-da Bakı şəhərində 800 respondent arasında keçirdiyi sorğunun nəticələri göstərir.
Qeyd olunur ki, Azərbaycanda prezident seçkiləri qarşıdan gələn bazar günü keçirilsəydi, Bakı şəhərində rəyi soruşulanların mütləq əksəriyyəti - 86,2% bu seçkilərə qatılardı. Respondentlərin 68,1%-i birmənalı olaraq "səsvermədə iştirak edərdim", 18,1%-i isə "yəqin ki, iştirak edərdim" cavab variantlarını seçib.
Məlum olub ki, paytaxt əhalisinin böyük əksəriyyəti - 92,8%-i öz səsini İlham Əliyevə verərdi. Rəyi soruşulanların 97%-i İlham Əliyevə tam etibar etdiyini, 89%-ə yaxını İlham Əliyevin onlar kimi insanların maraqlarına cavab verdiyini qeyd edib.
Sorğu, həmçinin müəyyən edib ki, respondentlərin 78,8%-i Prezident postunda İlham Əliyevə alternativ görmür.
Sorğu zamanı əldə edilmiş məlumatların təhlili göstərir ki, dövlət başçısının belə yüksək reytinqə və etimada sahib olması bütövlükdə uğurlu xarici siyasətin, iqtisadi inkişafla bağlı atılan addımların, milli ordunun əldə etdiyi uğurların və s. nəticəsidir.
Belə ki, rəyi soruşulanların əksəriyyəti Prezident İlham Əliyevin xarici siyasətini dəstəkləyir: 87, 3 % bu siyasəti "çox yaxşı" və ya "əsasən yaxşı" qiymətləndirib.
Cəmi 5% dövlətin xarici siyasətindən narazılığını bildirib ki, onların da 3,6%-i bu siyasəti "pis", 2,1%-i isə "çox pis" adlandırıb.
Respondentlərdən, həmçinin xarici siyasətimizdəki hansı hadisəni son vaxtların ən uğurlu hadisəsi hesab etdikləri soruşulub və cavab üçün bir neçə variant seçmək imkanı verilib.
Nəticədə 65,5% xarici siyasətin ən uğurlu hadisəsi kimi Prezident İlham Əliyevin Barak Obamanın dəvəti ilə Dördüncü nüvə təhlükəsizliyi sammitində iştirak etmək üçün Vaşinqtona səfər etməsini göstərib.
Təxminən o qədər - 63,8% respondent son vaxtların ən uğurlu xarici siyasət hadisəsi kimi Prezident İlham Əliyevin Ankara səfərini seçib. Özü də rəyi soruşulanların əksəriyyəti bu səfəri Türkiyəyə və terror aktları ucbatından Bakıya səfərini iki dəfə təxirə salmış Prezident R.T.Ərdoğana dəstək kimi qiymətləndirib.
Daha 38% xarici siyasətdəki uğurlu addımlar sırasında dövlət başçımızın İrana səfərini, 19% isə Azərbaycan, Rusiya və İranın xarici işlər nazirlərinin Bakıdakı görüşünü göstərib.
Araşdırmaya görə, Dağlıq Qarabağda gərginliyin artması fonunda İlham Əliyevə Ali Baş Komandan kimi dəstək də artıb - ona Ali Baş Komandan kimi rəyi soruşulanların 97%-i etimad göstərir.
Prezident və hökumətin iqtisadi sahədə atdığı addımlar da Bakı sakinləri arasında müsbət qarşılanır.
Belə ki, 28% respondent Azərbaycandakı iqtisadi vəziyyəti "yaxşı", 44% - "orta" və cəmi 18% - "pis" qiymətləndirib. Daha 10% sualı cavablandırmaqda çətinlik çəkib.
Paytaxt sakinlərinin əksəriyyəti əmindir ki, Prezident İlham Əliyevin sərəncam və tapşırıqları iqtisadi sahədə vəziyyəti kökündən dəyişir və ölkəni dünya bazarında neftin ucuzlaşmasının və qlobal iqtisadi böhranın mənfi təsirindən qoruyur.
Rəyi soruşulanların 62%-i hesab edir ki, Prezident İlham Əliyevin sahibkarlıq sahəsində yoxlamaların dayandırılması və lisenziyalaşdırmanın sadələşdirilməsi barədə sərəncamı kiçik və orta sahibkarlığın inkişafına kömək edəcək. Bu zaman 17,7% hesab edir ki, bu tədbirlər, yəqin ki, kömək etməyəcək, 8,2% isə əmindir ki, bunun heç bir köməyi olmayacaq.
Bakı sakinlərinin 68,2%-i hesab edir ki, bu tədbirlər kiçik və orta sahibkarlıq sahəsində lazımsız yoxlamaları aradan qaldıracaq, 16% isə bu nikbinliyi bölüşmür - onların fikrincə, bu tədbirlər müvəqqəti xarakter daşıyacaq və problemi kökündən həll etməyəcək. 15,8% cavab verməkdə çətinlik çəkib.
Respondentlər Prezidentin gömrük rəsmiləşdirilməsinin sadələşdirilməsi, şəffaflığın təmin olunması və inhisarçılığın aradan qaldırılması istiqamətində atdığı addımları da müsbət qarşılayır.
61% hesab edir ki, bu, kiçik və orta sahibkarlığın inkişafına kömək edəcək (25,3% buna əmindir, 35,7% isə hesab edir ki, "yəqin ki, kömək edəcək").
Daha 18,7% isə bunun əksini düşünür (8,5% - "kömək etməyəcək", 10,2% - "yəqin ki, kömək etməyəcək" cavablarını seçib).
20%-dən artıq respondent bu sualı cavablandırmaqda çətinlik çəkib.
Sorğu ilə müəyyən edilib ki, milli valyutanın devalvasiyasından sonra müvəqqəti yaranmış bədbinlik artıq aradan qalxmaqdadır.
Bakı sakinlərinin 63%-i hesab edir ki, dövlətin gördüyü tədbirlər milli valyutanın məzənnəsini sabitləşdirməyə imkan verir. 15% respondent bununla bağlı o qədər də nikbin deyil, 20% isə sualı cavablandırmaqda çətinlik çəkib.
Beləliklə, sorğunun nəticələri göstərir ki, paytaxt əhalisi həm dövlətin xarici siyasətini, həm də iqtisadi artım üçün atılan addımları müsbət qiymətləndirir.
Qeyd edək ki, Omnibus tipli ictimai rəy sorğusu "Rəy" Monitorinq Mərkəzi tərəfindən Bakı şəhərində 18 -19 aprel 2016-cı il tarixlərində keçirilib. Yaşayış yeri üzrə üzbəüz müsahibə yolu ilə keçirilən sorğuya yaşı 18 və yuxarı olan 800-ə yaxın respondent cəlb edilib. Nisbi xəta 3,5%-dir.