Son bir neçə ildə onlarla restoran "ərəbləşdi, məhz ərəb musiqisi, mətbəxi ilə ölkəmizə turist kimi gələn ərəblərə xidmət göstərməyə başladılar.

İndi isə mərkəzdə yerləşən bəzi iaşə obyektləri yerli müştərilərə xidmət göstərmək istəmir.

Unikal.org Minval.info-ya istinadən xəbər verir ki, Fərəc Eyvazov bildirib ki, restoranda məhz azərbaycanlı olduğu üçün özünə yer tapa bilməyib. 

Fərəcin sözlərinə görə, 11 iyul günü İngiltərə-Xorvatiya matçını izləmək üçün Nizami küçəsində yerləşən "Kolorit kafesinə üz tutub.

Bütün masalar dolu olduğu üçün bir qədər gözləyib. Daha sonra bir masa ətrafında əyləşənlər durub gediblər, masa boş qalıb. Fərəc masanın tamamilə boşaldığına əmin olmaq üçün bir az da gözlədikdən sonra əyləşmək üçün yaxınlaşıb.

Ancaq bu zaman restoranın ofisiantları Fərəcə mane olublar: "Mənə dedilər ki, bu masa doludur. Soruşuram ki, bəs niyə "reserved yarlığı qoymamısınız? Bundan sonra məni küçə davasına çağırdılar. Restoranın məsul şəxsi deyir ki, "Sən bilirsən, mən kiməm. Məni qorxutmağa çalışdılar. "Sizi məhkəməyə verəcəyəm dedikdə, mənə nalayiq sözlər deməyə başladılar. Mən hələ bu qədər biabırçılıq görməmişdim.

Şikayətçi iddia edir ki, bu yerləri ərəblər üçün saxlayırlar çünki, hər kəsə bəllidir ki, onlar daha çox yemək sifariş edir, restorana daha çox xeyir verirlər.

İddialarla ilə bağlı "Kolorit kafesi ilə əlaqə saxladıq. Kafenin Nizami filialının meneceri Elşad bəy bildirib ki, həmin günlər kafedə sıxlıq olur, masa bron edənlərin sayı çox, ona görə də belə çaşqınlıq yaranmış ola bilər: "Futbol üzrə Dünya çempionatının oyunları olan günlərdə həddindən çox rezerv alırıq. Bəzən elə olur ki, masa arxasına əyləşmək üçün uzun növbələr yaranır. Ola bilsin, müştəri masadan qalxdıqdan sonra hələ "rezerved yazılı lövhəni yerləşdirənə qədər digər müştəri əyləşmək istəyib. Ona görə də, belə anlaşılmazlıq yaşanıb. Dava məsələsinə gəldikdə isə, bizim əməkdaşlar heç vaxt belə addım ata bilməzlər. Axı özümüz də daim nəzarət edirik.

Yəni, kafe deyir ki, yer rezerv olub sadəcə bunu göstərən lövhə qoyulmayıb, şikayətçi isə bildirir ki, rezerv olduğunu göstərməyiblərsə, əyləşə bilər. Bəs bu halda tərəflərdən hansı haqlıdır?

Azad İstehlakçılar Birliyinin sədri Eyyub Hüseynov bildirib ki, rezerv olduğu göstərilməsə belə, restoranın müştəriyə yerini dəyişməyi xahiş etməyə tam haqqı çatır: "Restoranın əməkdaşları müştəriyə həmin masanın bron edildiyini deyərək, başqa masaya keçməsini istəyə bilər. Bu zaman müştəri seçim etməlidir, ya başqa masaya keçəcək, ya da məkanı tərk edə bilər.

Müştərinin davaya çağrılması məsələsi barədə isə E.Hüseynov söyləyib ki, müştəriyə qarşı zorakılıq halları artıq adiləşib: "Azərbaycan restoranlarında bu kimi böyük bir problem yaşanır. Hətta insanların üzünə baxıb buraxmırlar. Əgər bir təzyiq, xəsər yetirmə olubsa, müştəri buna görə mütləq lazımi yerlərə şikayət etməlidir.