Tanınmış jurnalist Mübariz Aslanov AzTV-nin yeni yaradılan Sosial media və İctimaiyyətlə əlaqələr şöbəsinə rəhbər təyin olunması barədə yayılan məlumata münasibət bildirib.

Unikal.org xəbər verir ki, o, hələlik, təyinat olmadığını bildirib.

“Son yayılan məlumatla bağlı açıqlamağa məcburam ki, hələ mən bu işə təyin olunmamışam, təyinat olmayıb və qərar verilməyib. Sadəcə ənənəvi olaraq edilən təklifi üzərimdə sınamaq üçün təcrübə dövründəyəm. Yəni, heç özüm də qərar verməmişəm”, - deyə jurnalist bildirib.

Qeyd edək ki, ötən gün Azərbaycan Televiziya və Radio Verilişləri Qapalı Səhmdar Cəmiyyətinin mətbuat katibi Xatirə Qasım vəzifəsindən azad edilib. X.Qasım Televiziya və Radio Akademiyasında İctimaiyyətlə əlaqələr şöbəsinin rəhbəri təyin olunduğunu bildirib. Həmçinin qeyd edib ki, AzTV-də mətbuat xidməti ləğv edilib, əvəzində Sosial media və İctimaiyyətlə əlaqələr şöbəsi yaradılıb.

Yeni yaradılan şöbəyə isə M.Aslanovun təyin edildiyi bildirilmişdi.