Bu gün Bakı Ağır Cinayətlər Məhkəməsində şirkət rəhbəri və anasını qətlə yetirməkdə təqsirləndirilən Ruhin Allahverdiyevin cinayət işi üzrə məhkəmə prosesi başlayıb.

Unikal.org lent.az-a istinadən bildirir ki, hakim Fikrət Qəribovun sədrliyi ilə keçirilən prosesdə məhkəmə istintaqı açıq elan edilib. Prokuror ittiham aktının nəticəvi hissəsini elan edib. İttihama münasibət bildirən Ruhin Allahverdiyev özünü qismən təqsirli bilib. O, məhkəmədə sərbəst ifadə verib. Təqsirləndirilən şəxs bildirib ki, qətli törədən zaman özündə olmayıb: "Aleksandrla tanışlığımız dostum Rəşad Abbasovun vasitəçiliyi olub. Rəşad mənim qrup yoldaşımdı. 10 ilə yaxın idi ki, görüşmürdük. Yolda rast gəldik. Oturduq söhbət elədik. İş axtarırdım. Rəşad türklərlə işlədiyini bildirdi və tezliklə məni də işə götürəcəklərini vəd etdi. Mən ali təhsilli olsam da, ixtisas üzrə heç zaman işləməmişəm. Usta işləyirdim, çörək pulumu çıxarırdım. Sonra Rəşad məni işə dəvət elədi. Məni Türkiyəyə təlimə göndərdilər. Aleksandr da Rəşadla dost idi. Biz Türkiyədə tanış olduq. Bir ev tutduq. Aleksandr atasını Türkiyəyə müalicəyə gətirmişdi. Çox müasir və bizim mentalitetimizə uyğun olmayan bir ailə idi. Atası yaxşı kişiydi. Bir də gördün, Aleksandr gəzməyə gedirdi, xəstə atasına mən baxırdım.  Sonra biz Bakıda görüşməyə başladıq. Aleksandrın atası rəhmətə getmişdi. Orada gedib iştirak etmişəm. Aleksandr evlərində bəzi düzəlməli şeyləri mənə tapşırırdı. Mən də onları təmir edirdim. Evlərində dəfələrlə olmuşam".
 
Təqsirləndirilən şəxs bir neçə müddətdən sonra Aleksandrdan görəcəyi işin pulunu alsa da, vəd elədiyi işləri görməməyə başladığını deyib: "Bir müddət sonra mənim problemlərin yaranmağa başladı. Ailədə, atamgillə münasibətlərim pisləşmişdi. Evdən çıxıb ayrı yerlərdə yaşayırdım. Aleksandrın evində bir-iki iş vardı. Onların pulunu almışdım. Amma eləməyə vaxtım olmurdu. Həmin zaman MTN-in sifarişi ilə iş götürmüşdük. Aleksandr mənə zəng eləsə də, onun telefonlarını götürmürdüm. Həmin zaman tüfeyli həyat yaşayırdım. Pulsuz parasız qalırdım. Aleksandrın işlərinə məsuliyyətsiz yanaşırdım. O mənə pislik eləməmişdi. Sonlarda məni polislə hədələyirdi".
 
Ruhin Allahverdiyev hadisə günündən danışıb: "Həmin gün evdəydim. Pulsuz-parasız qalmışdım. Aleksandrgilə getdim. Fikirləşdim ki, bir-iki işini görərəm, 5-10 manat pul alaram. Evlərinə gəldim. Anası qapını açdı. Məndən acıqlı idilər. Anası bu barədə etirazını bildirdi. Sonra mənə kofe süzüb gətirdi. Aleksandr yatmışdı. Anası dəfələrlə dedi ki, sənin işin lazım deyil. Mən isə Aleksandrın durmağını gözləyirdim. Fikirləşirdim ki, saqqızını oğurlayıb, iş görməsəm də, 5-10 manat pul alaram. Vəziyyətim pis idi. Aleksandr durdu. Gəlib görüşdü. Məni təhqir elədi ki, bizi aldadırsan, sənin işin bizə lazım deyil. Azərbaycanca bilmirdilər, mən də rus dilliyəm. Mübahisə elədik. Səhv məndə idi, sadəcə özümü bağışlatmaq istəyirdim. Anası oğluna deyirdi ki, Rəşada deyək bunu işdən çıxartsın. Aleksandr buna razı deyildi, deyirdi ayıbdır. Anası səs-küy saldı ki, dələduzluq edib. Mən onlara sakit olmaqlarını xahiş elədim. Aleksandrın əl-üzünü yumağa getdi. Anası telefonla zəng eləməyə getdi. Psixologiyam çox pozuldu, təmir üçün özümlə gətirdiyim olan sellofana yaxınlaşdım. Çəkicin qulpu çöldəydi. Heç sellefondan çıxartmadım. Sanki içimə şeytan daxil oldu. Gözlərim qaraldı. Çəkiclə qadının başına 3-4 zərbə vurdum. Başı parçalandı. Dalınca hamama tərəf getdim. Aleksandr güzgüdən anasını vurduğumu gördü. Aleksandra çatan kimi 4-5 zərbə də onun başına vurdum. Yerə yıxıldı. Dondum qaldım. Yerdən xalçanı götürüb, Aleksandrın üzünə saldım ki, üzünü görməyim. Başı tamamilə parçalanmışdı. Bilmirdim, neyləyəm. Gözüm Aleksandrın pul qabına sataşdı. Cibimdə bir qəpiyim belə yox idi. Pulqabısını götürdüm. İçində 200 manat vardı. Əl-üzümü yumadım. Qapını bağlamaq istəyirdim. Anasının çantasından açarı götürdüm. Çantada 20 manat da var idi. Onu da cibimə qoydum. Kofe içdiyim stəkanı da götürdüm ki, əl izim qalmasın. Qapını bağlayıb, aşağı düşdüm. 2 litlik su aldım. Əlimdə qan ləkələri var idi. Onları həyətdə heç kim görməyən yerdə yudum. Taksiyə minib Alatavaya gəldim. Şokdaydım. Araq alıb içdim. Bir az özümə gəldim. Dəli kimiydim. İki nəfəri həyatdan məhrum eləmişdim. Əynimdəki paltarları, pulqabını   yandırdım. Çəkici "Azneft" tərəfdə dənizə atdım. Vicdan əzabı çəkirdim".
 
Təqsirləndirilən şəxs hadisədən 11 gün sonra polis tərəfindən tutulduğunu bildirib: "Alatavadaydım. Gəlib tutdular. Gecə vaxtı dindirilmə başladı. Səhərə qədər müstəntiqə danışdım. O, səhərə qədər mənim onları niyə öldürdüyümü anlaya bilmədi. Çünki bunu izah edə bilmirdim. Sonra da o qədər bezmişdim, hansı sənəd gəldi, qol çəkdim"
 
Ruhin Allahverdiyev Aleksandr və anasını tamah məqsədilə öldürməyib: "Bu, belə deyil. Yazıblar ki, guya narkotik almağa pulum yoxuydu, ona pul çatdırmaq üçün öldürmüşəm. Bu, belə deyil. Düzdür, 15 ilə yaxındır, narkotik aludəçisiyəm. Amma heç zaman onun "küpünə girməmişəm". Məhkəmədən işə ədalətli hökmün çıxarılmasını istəyirəm. Mənim tamah məqsədim olmayıb. O vaxt psixologiyam normal deyildi. Hər şey problem olurdu. Evdə, ailədə, hamı ilə problem yaranırdı. Bunların səbəbkarı da mən idim. Hamısı yığışdı, belə partladı. Əməlimdən peşmanam".
 
Prosesdə ölən şəxslərin hüquqi varisi qismində Nərimanov rayon İcra Hakimiyyətinin hüquq şöbəsinin əməkdaşı Hüsi Nuriyev ifadə verib. O, ifadəsində ölən şəxslərin heç kimi olmadığı üçün hüquqi varis qismində iştirakından danışıb: "İstintaqa danışmışam. Xahiş edirəm ki, mənim iştirakım olmadan prosesə baxasınız. Ədalətli hökm çıxaracağınıza inanıram".
 
Prosesdə şahid qismində Orxan Davidov, Borusova Ksenya Sergeyevna, Elnarə Bağırova, Elman Abdulkərimov və bir neçə başqa şəxs ifadə verib.
 
Məhkəmə prosesi iyunun 17-də davam edəcək.
 
Qeyd edək ki, qətl bu il yanvarın sonunda baş verib. Bakı şəhəri, Nərimanov rayon sakinləri 1949-cu il təvəllüdlü Məhərrəmova Janna Hənifəyevna və 1982-ci il təvəllüdlü Məhərrəmov Aleksandr Gennadiyeviç yaşadıqları evdə qətlə yetiriliblər. Meyitlərə baxış keçirilərkən onların baş nahiyələrində küt alətlə endirilmiş zərbələrə xarakterik xəsarətlər aşkar edilib.
 
Polis və prokurorluq əməkdaşlarının həyata keçirdiyi təxirəsalınmaz istintaq-əməliyyat tədbirləri nəticəsində hadisəni törətməkdə şübhəli bilinən 39 yaşlı Ruhi Allahverdiyev saxlanılıb.
 
Araşdırmalar zamanı məlum olub ki, Ruhin Allahverdiyev hadisəni törədən evdə ustalıq edirmiş.
 
Onu da qeyd edək ki, Aleksandr Məhərrəmov "Biznes Dialoq" konsaltinq biznes xidmətləri şirkətinin rəhbəri olub. O həm də business-dialogue.az saytının təsisçisi idi.