Türkiyənin müdafiə naziri Hulusi Akar Yunanıstanı sağlam düşüncə və əməkdaşlığa çağırıb.
Unikal.org “Anadolu” agentliyinə istinadən verdiyi məlumata görə, H. Akar deyib ki, Türkiyə Aralıq dənizinin şərqində və Egey dənizində maraqlarını qorumağa, o cümlədən Kiprdə türklərin hüquqlarını təmin etməyə hazırdır.
H. Akar regionda Türkiyənin maraqlarını tapdayacaq status-kvonun formalaşmaması üçün Ankaranın beynəlxalq hüquq çərçivəsində bütün hüquqlarından istifadə etdiyini söyləyib. Türkiyənin müdafiə naziri bildirib ki, Egey və Aralıq dənizinin enerji resursları bütün tərəflərin maraqlarına xidmət etməli, birgə inkişaf üçün körpüyə çevrilməli, sülh və dialoqa yardımçı olmalıdır: Regionda uzunmüddətli sülh dənizdə zonaların sərhədlərinin müəyyənləşdirilməsi sahəsində razılığa gəlməklə mümkündür. Ankara bütün problemlərin beynəlxalq hüquqa, mehriban qonşuluğa və qarışlıqlı hörmətə əsaslanan dialoqla həllinə tərəfdardır. Biz opponentlərimizdən də bunu gözləyirik. Türkiyə bir millimetr belə yad əraziyə iddia etmir, ancaq öz hüquq və maraqlarını qorumaq üçün bütün resurslarından istifadə etməyə hazırdır. Regionda etimad mühitini qorumaq lazımdır”.
