Bakı Apellyasiya Məhkəməsində terror barədə bilə-bilə yalan məlumat verməkdə təqsirləndirilən Aydın Xudiyev barəsində olan hökmdən verilən apellyasiya şikayətinə baxılıb.
 
Unikal.org-un Trend-ə istinadən məlumatına görə, prosesdə təqsirləndirilən şəxsin vəkili prosesin ilkin baxış iclasından kassasiya şikayəti verdiyini bildirib. Hakim prosesi qeyri-müəyyən tarixə təxirə salıb.

İttihama görə, A.Xudiyev 2015-ci il iyunun 12-də I Avropa Oyunlarının açılış günü Fövqəladə Hallar Nazirliyinin "112" qaynar xidmətinə zəng edərək stadiona bomba qoyulduğunu bildirib.

O, polis əməkdaşlarının keçirdiyi əməliyyat-axtarış nəticəsində saxlanılıb. A.Xudiyevin evindən "Sony" markalı diktofon və "Panasonic" markalı kaset aşkarlanaraq götürülüb. O, Cinayət Məcəlləsinin 216-cı (terrorçuluq barədə bilə-bilə yalan məlumat vermə) maddəsi ilə ittiham olunub.

Bakı Ağır Cinayətlər Məhkəməsinin hökmü ilə A.Xudiyev 7 il müddətinə azadlıqdan məhrum edilib. Hökmdən narazı qalan A. Xudiyev apellyasiya şikayəti verib.O, şikayətində barəsində bəraət hökmünün çıxarılmasını istəyib.

A.Xudiyev "Yol Təhlükəsizliyi üzrə Əhalini Maarifləndirmə" İctimai Birliyinin rəhbəri olub.