Azərbaycan Respublikasının Prezidenti İlham Əliyevin təsdiqlədiyi regionların sosial-iqtisadi inkişafı dövlət proqramına uyğun olaraq “Azərsu” Açıq Səhmdar Cəmiyyəti kəndlərdə əhalinin içməli su təchizatının yaxşılaşdırılması məqsədilə layihələrin icrasını davam etdirir. 

“Azərsu” ASC-nin İctimaiyyətlə əlaqələr şöbəsindən Unikal.org-a verilən xəbərə görə, dövlət investisiya proqramı çərçivəsində Şabran rayonunun içməli su çatışmazlığından əziyyət çəkən Taxtalar kəndinin su təchizatının yaxşılaşdırılması məqsədilə yeni layihənin icrasına başlanıb. 

Şabran rayonunun Taxtalar kəndinin əhalisi uzun illərdir içməli su çatışmazlığından əziyyət çəkib. Vaxtilə rayonun Dağ Bilici kəndindəki bulaqdan kəndə su xətti çəkilib və bulaq quraşdırılıb. Bbir neçə il əvvəl quraqlıq səbəbindən su təchizatı dayanıb, mövcud su təchizatı sistemləri isə yararsız vəziyyətə düşüb. Ötən müddətdə sakinlər içməli tələbatlarını maşınlarla daşınan su hesabına ödəyib. 

Taxtalar kəndinin içməli su probleminin həlli məqsədilə “Azərsu” ASC tərəfindən layihə hazırlanıb və tikinti-quraşdırma işlərinə başlanılıb. Layihəyə əsasən, kəndin içməli su təchizatı Şabran şəhəri yaxınlığındakı su anbarı hesabına təmin olunacaq. Taxtalar kəndi relyef baxımından yüksəklikdə olduğundan suyun kəndə nəqli üçün nasos stansiyası quraşdırılacaq. Hazırda su anbarından kəndə qədər 114 mm diametrli polad borularla 4,8 km uzunluğundan magistral su kəmərinin tikintisi davam  etdirilir. Bununla paralel olaraq kənd ərazisində 3,7 km uzunluğunda paylayıcı su şəbəkəsi inşa edilir.

İndiyədək su xətlərinin yarıdan çoxu tikilib. Kənd ərazisində müxtəlif  məhəllələrdə əhalinin ümumi istifadəsi üçün 19 ədəd bulaq quraşdırılacaq. Bununla da Şabran rayonunun Taxtalar kəndinin 1000-dək sakini keyfiyyətli içməli su ilə təmin olunacaq.