Aprelin 19-u saat 13 radələrində Quba rayonu, Bərqov kənd sakinləri - 1966-cı il təvəllüdlü İlham Xudamov və 1973-cü il təvəllüdlü Sara Əsədovanın birgə yaşadıqları evdə ölmələri barədə rayon prokurorluğuna məlumat daxil olub.

Quba rayon prokurorluğundan "Unikal"a verilən məlumata görə, aparılmış ilkin araşdırmalarla İlham Xudamovun şəxsi münasibətlər zəminində aralarında yaranmış mübahisə zamanı bıçaqla keçmiş arvadı Sara Əsədovaya çoxsaylı xəsarətlər yetirərək qəsdən öldürməsinə, daha sonra həmin bıçaqla özünə xəsarət yetirərək intihar etməsinə əsaslı şübhələr müəyyən edilib.

Faktla bağlı Quba rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb. 

Hazırda cinayət işi üzrə istintaq davam edir.

***

15:14

Qubada baş verən qətl hadisəsinin təfərrüatları məlum olub.

"Unikal"ın əldə etdiyi məlumata görə, İlham Xudamov həyat yoldaşı Sara Xudamovadan boşandıqdan sonra da onlar eyni evdə yaşayıblar. Qətl törədilməzdən əvvəl evə Quba Rayon İcra Şöbəsinin əməkdaşları gəliblər. Onlar boşanma ilə bağlı olan sənədlərdə dəqiqləşdirmə aparıblar.

İcra məmurları evdən getdikdən bir müddət sonra İlham Xudamovla Sara Xudamova arasında yaranan mübahisə qətllə nəticələnib. Artıq hər iki şəxsin meyiti morqa aparılıb.

Cütlüyün 2 oğlu və 1 qızı, eyni zamanda nəvələri də var.

Faktla bağlı araşdırma aparılır.

Murad İbrahimli

***

14:53

Qubada qətl hadisəsi baş verib.

"Unikal" xəbər verir ki, hadisə rayonun Paşaoba kəndində qeydə alınıb. Kənd sakini Xudamov İlham Əziz oğlu keçmiş həyat yoldaşı Xudamova Sara Şair qızını qətlə yetirib. Daha sonra damarlarını kəsərək intihar edib.

Onların bir müddət öncə boşandıqları və məhkəmənin hökmü ilə əmlakın ər və arvad arasında bölündüyü bildirilir. Ayrıldıqdan sonra cütlük bir evdə yaşayıb.(apa)