Cari ilin ilk yarısında Türkiyədən Azərbaycana avtobus, mikroavtobus ixracı artaraq, 4 milyon 293 min dollardan 41 milyon 467 min ABŞ dollarına yüksəlib.

"Unikal" xəbər verir ki, bu barədə məlumatı Uludağ Avtomobil Sənayesi İxracatçıları Birliyi yayıb.

Qeyd edilir ki, ilin ilk yarısında Türkiyədən 68 ölkəyə 581 milyon 214 min dollarlıq avtobus, mikroavtobus ixrac edilib. Avtobus və mikroavtobus ixracı 2021-ci ilin eyni dövrü ilə müqayisədə 13,98 % artıb.

Ötən ilin yanvar-iyun aylarında 509 milyon 911 min dollar olan ixrac satışını həyata keçirən nəqliyyat sektorunun nümayəndələri bu ilin eyni dövründə həmin göstəricini 581 milyon 214 min dollara yüksəldiblər.

Türkiyə ən çox Fransaya avtobus, mikroavtobus satıb. Nəqliyyat vasitələrinin ixracı 18,23 faiz artıb. Əgər ötən ilin yanvar-iyun dövründə bu göstərici 125 milyon 606 min dollar olubsa, 2022-ci ilin ilk yarısında Fransaya ixrac 148 milyon 510 min dollara yüksəlib.

Siyahıda ikinci yerdə Portuqaliya, sonrakı yerdə Almaniya qərarlaşıb.