Xəbər verdiyimiz kimi, Rusiyanın Ermənistandakı səfiri Sergey Kopirkin Ermənistan-Azərbaycan sərhədində işləyən Aİ-nin Ermənistandakı missiyası monitorinq adı altında Rusiya, Azərbaycan və İrana qarşı mübarizə aparmaq üçün kəşfiyyat məlumatlarının toplanması ilə məşğul olduğunu bildirib.
Həmçinin, son günlərdə Ermənistan sərhəddə bir neçə dəfə təxribat törədib. Belə ki, Ermənistan silahlı qüvvələrinin bölmələri Ordumuzun Kəlbəcər rayonu və Naxçıvanda yerləşən mövqelərini atıcı silahlardan atəşə tutub.
Məsələ ilə bağlı "Unikal"a açıqlama verən sabiq xarici işlər naziri Tofiq Zülfüqarov bildirib ki, ermənilərin məqsədini demək çətindir:
"Vizual şəkildə hansı kəşfiyyat məlumatını toplamaq olar, bu da sual altındadır. Əminəm ki, kəşfiyyat məlumatları onlara Fransa tərəfindən ötürülür. Onlar bu məlumatları müxtəlif müasir üsullar və avadanlıqlarla toplayırlar.
Ermənilər Fransa Prezidenti Emmanuel Makronun ölkələrinə səfəri olacağını planlaşdırırlar. Son günlərdə sərhəddə təxribatlar törətmələri də məhz bununla bağlıdır.
Ermənilər göstərmək istəyirlər ki, guya, onlar üçün təhlükə var. Bu barədə hansısa bəyanatların və vədlərin verilməsini istəyirlər.
Yəni, həmişəki kimi, ermənilər təxribat xarakterli siyasət yürüdürlər və köhnə üsullarından istifadə edirlər", - deyə o qeyd edib.
Murad İbrahimli
