Başqırdıstanda nənəsini öldürüb dondurucuda gizlədən şəxs mühakimə olunub. 

"Unikal" xəbər verir ki, bu barədə Rusiya İstintaq Komitəsinin region üzrə İstintaq İdarəsi məlumat yayıb. 

Həmin şəxs Rusiya Federasiyası Cinayət Məcəlləsinin 105-ci maddəsi ilə təqsirli bilinib.

2023-cü il iyulun 25-də bir qadın hüquq-mühafizə orqanları ilə əlaqə saxlayıb və oğlu ilə İdyaşeovo kəndində yaşayan 85 yaşlı anasına baş çəkməyə gəldiyini bildirib. Hadisə yerində nə təqaüdçü, nə də oğlu tapılmayıb. O, anasının harada olduğunu öyrənmək üçün oğlu ilə əlaqə saxlayıb. Oğlu ona lazımi qayğı göstərmək üçün nənəsini kəndə apardığını bildirib. Sonra əlaqə kəsilib. 

Əməliyyatçılar 30 yaşlı şübhəlini Ufada tapıblar. Dindirmə zamanı o, nənəsinin öldüyünü, cinayət məsuliyyətinə cəlb olunacağından qorxaraq meyiti dondurucuda gizlətdiyini bildirib. Evə baxış zamanı meyit aşkar edilib. Məhkəmə-tibbi ekspertizası qadının cəsədində xəsarətlər aşkar edib.

Dəlillər təqdim edildikdən sonra həmin şəxs törətdiyi cinayəti etiraf edib və bildirib ki, bir gün evə spirtli sərxoş vəziyyətdə qayıdıb və aralarında münaqişə yaranıb. Nəticədə o, qadına bir neçə zərbə vurub və onu təpikləyib. Səhər isə qadının öldüyünü görüb. 

Məhkəmənin hökmü ilə o, 15 il 1 ay müddətinə həbs olunub. 

Ağarza Elçinoğlu