Moskva vilayətində Rusiyanın keçmiş əmək və sosial inkişaf naziri, keçmiş senator və Dövlət Dumasının keçmiş deputatı Sergey Kalaşnikovun evinə silahlı basqın olub.
"Unikal" xəbər verir ki, bu barədə "Baza" Telegram kanalı məlumat yayıb.
Hadisə iyulun 28-də axşam saatlarında Krasnoqorsk rayonunda baş verib. Kamuflyaj kostyumlu və şalvarlı 5 nəfər naməlum şəxs eyvandan evə daxil olaraq ev sahibini bağlayıb, döyərək pul tələb ediblər. Kalaşnikovun sözlərinə görə, hücum edənlərdən biri ağ "papier-mache" maskası taxıb və hücum edənlər Asiya ləhcəsi ilə danışıblar.
Soyğunçular tapança və bıçaqla hədə-qorxu gələrək ev sahibini onlara 100 min rubla yaxın pul və dəyəri 1 milyon rubldan çox olan qiymətli əşyaları verməyə məcbur ediblər. Oğurlanan əşyalar arasında “Makarov” mükafatı tapançası, “İzh” ov tüfəngi və “iPhone 11 Pro” da olub. Quldurlar silah seyfini aça bilməyiblər.
Hücum edənlər qaçdıqdan sonra Kalaşnikov özünü iplərdən azad edərək kənd nəzarət-buraxılış məntəqəsinə çata bilib və orada polis çağırıb.
Polis cinayətkarları axtarır. Hüquq-mühafizə orqanları hücumda ərazidə işləyən miqrantların əli ola biləcəyinə inanırlar.
Qəribədir ki, Kalaşnikov daha sonra soyğunçuluq hadisəsi ilə bağlı xəbərin zarafat olduğunu deyib.
