İsmət Abbasovun kadrları vurulur
İsmət Abbasovun kadrları vurulur

İnstitutun vəzifəli şəxsləri ilə bağlı korrupsiya...

Kənd təsərrüfatı naziri İsmət Abbasov vəzifəsindən çıxarılsada, baş nazirin müavini təyin olunduğu üçün çoxları hesab edirdi ki, o bununla həm özünün, həm də kadrlarının təhlükəsizliyini təmin edəcək. Amma gözləntilər özünü doğrultmadı.
Çünki yeni nazir ciddi araşdırmalara start verdi və İsmət Abbasovun sağ əli kimi tanınan və nazirliyin işini iflic edən şəxslər vəzifələrini itirdilər. Növbəti belə bir zərbə isə Kənd Təsərrüfatı Nazirliyinin Elmi-Tədqiqat Heyvandarlıq İnstitutuna dəydi. Belə ki, institutun vəzifəli şəxsləri tərəfindən dövlət büdcəsindən ayrılmış vəsaitlərin xərclənməsi zamanı ciddi maliyyə pozuntularına yol vermələri barədə Maliyyə Nazirliyindən daxil olmuş material Baş prokuror yanında Korrupsiyaya qarşı Mübarizə İdarəsində araşdırılıb. Baş Prokurorluğun mətbuat xidmətindən daxil olan xəbərə görə, araşdırmalar zamanı institutun vəzifəli şəxsləri tərəfindən öz qulluq səlahiyyətlərindən qulluq mənafelərinə qəsdən zidd olaraq 2006-2013-cü illərdə ştatda olan və ştatdankənar işçilərə işləmədikləri halda onların adına qanunsuz olaraq 14.0 min manat məbləğində əmək haqqının hesablanması, işçilərə əsassız olaraq 34.3 min manat məbləğində əmək haqqının ödənilməsi, məzuniyyət haqqının və ezamiyyət xərclərinin düzgün hesablanmaması nəticəsində işçilərə 38.7 min manat məbləğində artıq vəsaitin ödənilməsi, istifadəyə yararsız avtomaşınların sürücülərinə qanunsuz olaraq 12.2 min manat məbləğində əmək haqqının ödənilməsi, 77.7 min manat dəyərində inventar və avadanlığın çatışmamazlığı, müxtəlif işlərin görülməsi adı ilə 26.1 min manat məbləğində vəsaitin hesabdan əsassız silinməsi, 61.3 min manat dəyərində dərman preparatlarının əsassız silinməsi, nəqliyyat vasitələri üçün 5.1 min manat dəyərində yanacağın artıq silinməsi və digər qanun pozuntularına yol vermələrində əsaslı şübhələr olduğundan faktla bağlı Cinayət Məcəlləsinin 308.1 (vəzifə səlahiyyətlərindən sui-istifadə) maddəsi ilə cinayət işi başlanıb.Hazırda iş üzrə istintaq davam etdirilir.
İnformasiya şöbəsi