Astara gömrüyündə onlarla avtobus növbə gözləyir. İraqın Kərbəla şəhərinə, İmam Hüseynin 40 mərasiminə zəvvar aparan avtobusların sürücüləri ilə terminal işçiləri arasında mübahisələr də yaranır.

Unikal.org azadliq.org-a istinadən bildirir ki, terminal işçiləri avtobusların gömrüyə növbə ilə keçməsini istəyirlər. Onlar deyirlər ki, noyabrın 12-də hər birində 40-45 zəvvar olmaqla 10 avtobus yola salıblar. Gecikmənin səbəbini isə İran tərəfinin yoxlamaları ilə izah edirlər. Terminal işçilərinin dediyinə görə, İran gömrüyü zəvvarları yoxlayıb əraziyə buraxır. Bu da vaxt aparır.

Zəvvarlardan biri deyir ki, Kərbəla ziyarətinə getməkdən ötrü avtobusa 350 manat pul ödəyib. Ziyarətə gedib-gəlməyə ümumilikdə 1000 manatdan yuxarı xərc çıxır.

Gürcüstandan gələn şiə müsəlmanlar əllərində bu ölkənin bayrağını tutublar. Onlar bildirirlər ki, hər bir adam avtobusa 250 dollar ödəyib. Zəvvarların arasında gənclər çoxluq təşkil edir. Danışmağa həvəsli deyillər. Aralarında qadınlar da az deyil.

Terminalın bir işçisi deyir ki, bu il Kərbəlaya gedənlərin sayı qat-qat çoxdur. Hər il Kərbəlaya 10-15 avtobus zəvvar gedirdisə, bu il avtobusların sayı 100-ü ötüb...

Xatırlatma

Bu il İslamda müqəddəs sayılan məhərrəm ayı oktyabrın 3-də başlayıb. Oktyabrın 12-si Aşura mərasimləri keçirilib (Aşura ərəb dilində onuncu gün deməkdir. Hicrətin 61-ci ilində məhərrəm ayının onuncu günündə, Kərbəla çölündə qətliam baş verib)

Məhəmməd peyğəmbərin nəvəsi, şiə imamı Hüseyn və onun tərəfdarlarının qətlə yetirilməsi (Kərbəla hadisəsi) Məhərrəm ayında baş verdiyindən, müsəlman ölkələrində onu matəm ayı kimi qeyd edirlər.

Hər il minlərlə insan Kərbəlaya toplaşaraq, hicrətin 61-ci ilində Kərbəlada öldürülən İmam Hüseyn və 72 tərəfdarına yasını saxlayır.

Məhərrəmlik mərasimi ümumilikdə məhərrəm və səfər aylarında davam edir.
İslamda məhərrəm ayında müharibə günah sayılır.