Son günlərdə mətbuata verdiyi müsahibələri və sosial şəbəkələrdə yayılan fotoları ilə gündəmə gələn sabiq baş nazir Surət Hüseynov qalmqallı fikirləri ilə səs-küyə səbəb olub. Ölkə.az-a müsahibədə əsas diqqətçəkən məqam S.Hüseynovun 1992-93-cü illərdə mövcud olmuş AXC-Müsavat hakimiyyəti barədəd söylədikləridir. O, AXC-Müsavat hakimiyyətində təmsil olunmuş şəxsləri ən ağır formada ittiham və təhqir edib, hətta özünün iddiasına görə, "azad etdiyi Azərbaycan torpaqları AXC-Müsavat iqtidarı tərəfindən ermənilərə satılıb. 

Unikal.org xəbər verir ki, qiyamçı eks-baş nazirin bu açıqlamasına sabiq prezident Ayaz Mütəllibov da seyrçi qalmayıb. O, Modern.az-a açıqlamasında Surət Hüseynova haqq qazandırıb və deyib ki, onun əməllərinə hər zaman ləkə vurmağa çalışıblar:

"Surət Hüseynovun xeyirxah işlərlə məşğul olması danılmaz faktdır. Ona ləkə atmaq yanlışlıqdır. Bəzi azərbaycanlılar öz övladlarını ləkələyib məsələnin əhəmiyyətini də pozurlar. Surət Hüseynova Milli Qəhrəman adını verən də, alan da əsaslandırmalıdır ki, niyə məsələ belə formada təqdim olunub? Zarafat deyil. Milli Qəhrəman adını verib qısa müddətdən sonra əlindən alırsan. Bu necə olur? Elçibəy iqtidarı dövründə ona qarşı silahlı dəstə göndərilib. Orda da qan tökülüb. Kölgəli məsələlər var.
Surət Hüseynovun müsbət əməllərini inkar etmək olmaz. Hərçənd ki, onun bir çox işləri ilə yaxından tanış deyiləm. Amma bildiyimə görə Qarabağ məsələsi ilə yaxından məşğul olub və əlindən gələni edib. Bunu inkar etmək olmaz. Qaldı ki ordu məsələsinə, o zaman nizami ordumuz yox idi.

Eks-prezident sabiq baş nazirin Rusiyanın adamı olması barədə deyilənlərə bu formada cavab verib:

"Surət Hüseynovun Rusiyanın adamı olduğunu söyləməzdən öncə bunu izah etmək lazımdır. Agent olduğunu kim isbat edə bilər? Belə danışmağa nə var ki! Bunu qısqanclıqdan da söyləmək olar.

"Heç Surət Hüseynovla Moskvada görüşünüz baş tutubmu sualına Ayaz Mütəllibovun cavabı belə olub:

"Bir dəfə Moskvada görüşdük. Mənim ona deyiləsi sözüm yox idi. Hər halda söhbətimiz oldu. İndi dediklərinin əksəriyyətini o zaman da demişdi. Böhtan olduğunu dilə gətirməklə haqqında yanlış fikirlər söylədiyini bildirmişdi.
Hətta bir dəfə Nazirlər Kabinetinin iclasında tənqid etdim ki, Yevlax kombinatında əyri-əskikliklər var. Bu məsələ Surət Hüseynova da çatmışdı. O da bu sözlərimdən incimişdi. Mənsə sadəcə, istintaqın kimin günahkar olub-olmadığını göstərəcəyini demişdim.

Surət Hüseynovun qalmaqallı açıqlamalar verməsinin hansı məqsədi daşımasına gəlincə, Mütəllibov bunları deyib:

"Onun uzun illərdən sonra belə açıqlamalar verməsinin hansı məqsədi daşıdığını deyə bilmərəm Bəlkə də təəssüflənir. Bəlkə, incikliyi hələ də qalır