Qubadlı rayon İcra Hakimiyyətinin inzibati binasinda 2018-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş yığıncaq keçirilib. Toplantıda Qubadlı rayon İcra Hakimiyyətinin başçısı Malik İsaqov, rayon icra Hakimiyyəti başçısının aparatı, rayonun idarə, müəssisə və təşkilat rəhbərləri, ictimaiyyət nümayəndələri iştirak ediblər.

Unikal.org xəbər verir ki, tədbirdə rayon İcra Hakimiyyətinin başçısı Malik İsaqov giriş nitqi söyləyərərk qeyd etdi ki, məlum olduğu kimi iyul ayının 8-də Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2018-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclası keçirilib. Malik İsaqov qeyd etdi ki, Azərbaycan öz dinamik inkişaf templərini saxlayaraq həm iqtisadi, həm beynəlxalq siyasət sahələrində uğurlar əldə edib.

Başçı vurğuladı ki, məlum olduğu kimi, iyul ayının 3 də Gəncə şəhər İcra Hakimiyyəti başçısına qarşı törədilmiş sui-qəsd və bundan bir neçə gün sonra iyul ayının 10-da radikal elementlərdən ibarət bir qrup Gəncə şəhərinin mərkəzində qanunsuz aksiya keçirməyə cəhd göstərib. Qanunsuz və təxribat xarakterli aksiyanı dayandırmaq məqsədilə xidməti vəzifəsini yerinə yetirən zaman iki yüksək rütbəli polis əkəkdaşı bir qrup şəxs tərəfindən hücuma məruz qalaraq amansızlıqla soyuq silahla qətlə yetirilib. Təbii ki, bu cür xoşa gəlməz hadisələr hər bir azərbaycanlı kimi biz Qubadlılarda da təssüf hissi yaratdı. Gəncədə törədilmiş terror hadisəsi ölkəmizə qarşı xarici qüvvələr tərəfindən Azərbaycanda sabitliyin pozulmasına, dövlətə və dövlətçiliyə qarşı yönəlmiş bir addımdır. Əminliklə qeyd etmək istəyirəm ki, Azərbaycan xalqı sabitliyin pozulmasına, iğtişaşa qarşıdır. Çünki xalqımız dinc şəraitdə, xoşbəxt yaşamağın tərəfdarıdır.

Sonra tədbirdə Rayon İH başçısının müavini Allahverdi Haxverdiyev hesabat məruzəsi ilə çıxış etdi. Məruzəçi qeyd etdi ki, rayon əhalisi respublikanın 41 müxtəlif şəhər və rayonunda məskunlaşıb. Cari ilin 01 iyul vəziyyətinə rayon əhalisinin sayı 37 min 800 nəfərdir. Rayonda 20 min 300 nəfər əmək qabiliyyətli əhali var. Cari ilin 6 ayı ərzində 53 yeni iş yeri açılıb. Ümumiyyətlə son 14 ildə rayon üzrə yeni yaradılan iş yerlərinin sayı 3 min 807-nə çatdırılıb.
2018-ci ilin birinci yarımilində sakinlərimizin məskunlaşma yerlərində yaşayış şəraitinin yaxşılaşdırılması istiqamətində də işlər davam etdirilib. Rayon İcra Hakimiyyəti başçısının Sabirabad, Saatlı, İmişli, Xızı rayonlarında və digər yerlərdə keçirdiyi səyyar qəbullar zamanı sakinlər tərəfindən qaldırılan məsələlərin həlli istiqamətində müəyyən işlər görülüb.

Bunlardan əlavə rayon İcra hakimiyyətinin daxili imkanları hesabına rüb ərzində yas mərasimlərinin təşkilinə, xəstələrin müalicəsinə, Böyük Vətən müharibəsi veteranlarına, bir sıra tədbirlərin keçirilməsinə və sair məsələlərlə bağlı aztəminatlı ailələrə 40 min 500 manat pul köməkliyi edilib.
Yerli gəlirlərdən daxil olma 959 min 414 manat proqnoz rəqəminə qarşı 1 milyon 284 min 47manat və ya 1,3 dəfə çox icra olunub. Bu da nəzərdə tutulduğundan 234 min 633 manat artıq vəsaitin daxil olması deməkdir.

Rayon Vergilər şöbəsi də öz işini günün tələbləri baxımından qurmağa çalışıb. 01 iyul 2018-ci il tarixə kimi şöbədə 1793 vergi ödəyicisi uçota alınıb. Onların da hazırda 994-ü faktiki fəaliyyət göstərir. Vergilər şöbəsi hesabat dövrü 1166 min 100 manat plana qarşı 1561 min 500 manat vəsait toplayıb. Bu da planın 133,9 %-i, yəni 395 min 400 manat artıq vəsaitin daxil olması deməkdir.

Cari ilin birinci yarımilində hüquq-mühafizə orqanları üzərlərinə düşən vəzifələri yerinə yetiriblər. Asayişin qorunması təmin edilib, istintaq və təhqiqat qrupunda cinayət tərkibli ərizə və ya material qeydə alınmayıb.

Rayon Təhsil şöbəsi də işini müvafiq Qanun və Təlimatlar əsasında qurub, qarşıya qoyulan vəzifələrin həllinə səy göstərib. Hesabat dövründə Dövlət İmtahan Mərkəzi tərəfindən IX və XI siniflərdə keçirilmiş mərkəzləşdirilmiş imtahanların nəticələri də uğurlu olub. Belə ki, IX, XI siniflərdə imtahanlarda iştirak edən 76 nəfər şagird fərqlənmə attestatı ilə təltif olunub, keyfiyyət 59,5 % təşkil edib.

Qeyd olundu ki, ötən dərs ilində Dövlət İmtahan Mərkəzinin rəsmi açıqlamasında rayonumuz ali məktəblərə qəbulun nəticələrinə görə birinci yerə layiq görülüb, IX və XI siniflərin nəticələrinə görə isə ilk onluqda qərar tutub.

Qeyd olunanlarla yanaşı məktəblərimiz respublika səviyyəli bütün tədbirlərdə də yaxından iştirak etməklə xeyli uğur qazanaraq Fəxri fərmanla və Diplomlarla təltif olunub.

Rayon Mərkəzi Xəstəxanasınının poliklinika şöbəsi 3 tibb məntəqəsi ilə birlikdə məcburi köçkünlərə tibbi xidmət göstərilməsi işini davam etdirərək cari ilin birinci 6 ayı ərzində 11 min 756 ambulator xəstə qəbul edib, onlardan 27 nəfər xəstəni stasionar müalicəyə, 38 nəfər isə sanator-kurort müalicəsinə göndərib. 527 nəfər şəkərli diabet olan xəstələr dərman və tibbi ləvazimatla təmin edilib.

Səfərbərlik və Hərbi Xidmətə Çağırış üzrə Dövlət Xidmətinin rayon bölməsi tərəfindən yanvar ayında 20 nəfər, aprel ayında 22 nəfər hərbi xidmətə göndərilib. Hazırda iyul çağırışı davam edir və 82 nəfər çağırışçı hərbi xidmətə yola salınacaqdır. 324 nəfər gənc isə ilkin hərbi qeydiyyata alınıb, 9 nəfər gənc könüllü olaraq müddətdən artıq həqiqi hərbi xidmətə yola salınıb.

Məruzəçi bildirdi ki, Rayon İcra Hakimiyyətinin köməkliyi ilə rayonda baramaçılıq inkişaf etdirilib və 520 kq əvəzinə 578 kq yüksək kefiyyətli barama istehsal edərək Respublika üzrə birinci olaraq planı artıqlaması ilə yerinə yetirib. Rayonda xüsusilə son illər arıçılığın inkişafındakı nailiyyətlər, arı ailələrinin sayının 5 min 200-ə yaxınlaşıb.
Gənclər siyasətinin rayonda ardıcıl həyata keçirilməsi üçün müntəzəm iş aparılır. 2005-2006-ci il təvəllüdlü yeniyetmələr arasında futbol üzrə "Sevinc kuboku uğrunda Xaçmaz rayonunda keçirilən ölkə birinciliyində rayonun komandası birinci yeri tutaraq respublika çempionu olub.

Rayon idmançıları beynəlxalq yarışlarda da yüksək nəticələr göstərib.

Hesabat dövrü rayon İcra hakimiyyətinin fəaliyyət istiqamətlərindən birini də vətəndaşların qəbulu, onların müraciətlərinə baxılması işi təşkil edib. 2018-ci ilin 6 ayında rayon icra hakimiyyətinə ümumi daxil olan yazılı vətəndaş müraciətlərinin sayı 48 olub.

2018-ci ilin 6 ayında RİHB-ı tərəfindən aparatda qəbul qrafiki üzrə 333 nəfər qəbul edilib. Qəbul zamanı edilən müraciətlərin 188-i müsbət həll edilib, 81-nə müvafiq hüquqi izahat verilib, 1 müraciət isə aidiyyatı qurumlara göndərilib, 25 məsələ icradadır. 33 məsəlinin həlli isə müvafiq Dövlət Proqramında nəzərdə tutulur.

2018-ci ildə vətəndaşlarla keçirilən 19 görüş-qəbulda 96 müraciət olub. Qeydə alınan müraciətlərdən 61-i müsbət həll edilib. Qalan müraciətdən 13-ü isə mərkəzi icra hakimiyyəti orqanları qarşısında məsələ qaldırılaraq icraata götürülüb. 22-si müraciətə isə müvafiq izahatlar verilib.

2018-ci ilin birinci yarısının yekunları bunu deməyə əsas verir ki, rayon əhalisi arasında əvvəlki illərdə olduğu kimi ictimai-siyasi baxımdan heç bir narahatlıq olmayıb. Rayonda bu gün də əsas aparıcı siyasi partiya 3500 nəfərdən artıq üzvü olan Yeni Azərbaycan Partiyasıdır. Sakinlərimiz həmişə olduğu kimi dövlətçilik ənənələrinə sədaqət nümayiş etdirib, Azərbaycan Respublikasının Prezidenti cənab İlham Əliyevin siyasətini ürəkdən bəyənərək müdafiə ediblər.

Sonra tədbirdə çıxış edən DSMF-un rayon şöbəsinin rəisi Cəlaləddin Məmmədov , Rayon Məşğulluq Mərkəzinin direktoru Cəfər Ağayev, Rayon Kənd Təsərrüfatı idarəsinin rəisi Ənvər Quliyev, Balasoltanlı kənd inzibati ərazi dairəsi üzrə nümayəndə Xanlar Əliyev, Çardaxlı kənd inzibati ərazi dairəsi üzrə nümayəndə Oktay Əsgərov rayonda müvaffiq sahələr üzrə görülən işlərdən bəhs etdilər.