Qırğızıstanın gömrüyünün keçmiş rəis müavini Raim Matramov ölkədən 700 milyon dollar çıxarıb.
Unikal.org xəbər verir ki, bu sensasion faktı “Azadlıq” radiosunun qırğız redaksiyasının araşdırması aşkar edib. Video-araşdırmaya internetdə bir sutkadan da az müddətdə yüz minlərlə adam baxıb.
Jurnalist müəyyən edib ki, keçmiş rəis müavini ölkədən yüz milyonlarla dolları çıxarmaq üçün adi “kitayski” torbalardan istifadə edib. Daha 700 milyon dollar isə ölkədən müxtəlif banklar üzərindən çıxarılıb. Bu iki məbləğin cəmi az qala Qırğızıstanın dövlət büdcəsinin gəlirləri həcmindədir.
“Azadlıq” radiosunun redaksiyasının sərəncamında elə sənədlər var ki, onlarla tanış olanda adamın saçları biz kimi olur. Bizim etibar etdiyimiz mənbələr xəbər veriblər ki, 2011-2017-ci illərdə Qırğızıstanın bir neçə bankı üzərindən xaricə 700 milyon dollar çıxarılıb. Və bizim əlimizdə bunu təsdiq edən onlarla sənəd, bank qəbzləri var. Bu sənədlər həmin məbləğin azı 250 milyon dollarının çıxarıldığını birbaşa təsdiqləyir”-radionun jurnalisti Əli Toktakunov bildirir.
Araşdırmada deyilir ki, bu maxinasiyaların izləri Qırğızıstan Gömrük Komitəsinin keçmiş rəis müavini Raim Matraimova aparır. Əslində Matraimov Qırğızıstanda xalq arasında çoxdandır “Milyon Raim” kimi tanınır və onun sərəncamında çoxlu pulların olduğu haqda neçə vaxtdır danışılırdı. Lakin hakimiyyət dövlət məmurunda bu qədər pulun haradan olduğuna hələ də cavab verə bilməyib.
Jurnalistlər müəyyən ediblər ki, ölkədən çıxarılan yüz milyonların bir hissəsini Çin vətəndaşı Ayerkin Saymaiti göndərib. Həmin adam arvadı Vufulu Bumailiamunun adından iki il sərasər Matraimovların ailə xeyriyyə fonduna pul köçürüb. Fond Matraimovun kiçik qardaşının adına qeydiyyatdan keçib.
Matraimovlar Qırğızıstanın cənubunda nüfuzlu klan hesab edilir. Onun gömrükçüləri ticarətçiləri malların gömrükdən keçirilməsi üçün hər dəfə bir neçə min dollar ödəməyə məcbur ediblər.
“Bütün gömrük əməkdaşları Raimin kiçik qardaşı Ruslan Matraimovun əmri ilə hərəkət etdiyi üçün biz işləyə bilmirik. Bizim kreditlərimiz var. Bu kreditlərin hesabına işləyirik, dövlətə vergi veririk, üstəlik gömrükçülərin cibini doldururuq”-ticarətçilərdən biri anonimlik şərti ilə bildirib.
Xatırladaq ki, Qırğızıstanın Gömrük Komitəsinin keçmiş sədri, Avrasiya İttifaqı hökumətinin naziri olmuş Adamkul Junusov 2018-ci ilin dekabrında Bakı aerportunda həbs edilmişdi. O, korrupsiya cinayətlərinə görə axtarışda idi və Nyu-Yorkdan Bakıya gələrkən tutulmuşdu. Junusov bir neçə ay sonra ölkəsinə ekstradisiya edilib.
