Xalq artistləri Brilliant Dadaşova və Aygün Kazımova iyulda keçiriləcək "Jara" beynəlxalq musiqi festivalının qonaqları sırasında yer alıblar.

Unikal.org xəbər verir ki, bir neçə həftə əvvəl adları açıqlanan ifaçıların eyni gündə - iyulun 26-da səhnəyə çıxacağı bildirilmişdi. İllərdir küsülü olan müğənnilərin eyni səhnəni bölüşəcəyi səs-küy yaratmışdı.

Bu gün isə festivalın proqramında dəyişiklik edildiyi açıqlanıb. Belə ki, Kazımovanın çıxış edəcəyi tarix dəyişdirilib. Aygün iyulun 26-da yox, iyulun 25-də "Jara"da sevənlərinin qarşısına çıxacaq.

Dadaşova isə iyulun 26-da festivalda mahnısını ifa edəcək. Bundan əvvəl "Jara"ya qatılacaq yerli müğənnilər arasında adı yer alan Xalq artisti Zülfiyyə Xanbabayeva isə siyahıdan çıxarılıb. Onun yerinə isə səhnəyə Əməkdar artist Miri Yusif çıxacaq.

Qeyd edək ki, "Jara" artıq dördüncü ildir Xalq artisti Emin Ağalarovun təşkilatçılığı ilə keçirilir. Gecədə həmçinin Rusiyanın tanınmış incəsənət nümayəndələri çıxış edirlər.