Abşeron rayonunda Vətən müharibəsi şəhidi Veysəl Musibovun, tibb xidməti leytenantı Turqut Xəlilbəylinin, əsgər Nurlan Ağakişiyevin, Cəbrayıl Dövlətzadənin, Rahid Sadıxovun anım günləri qeyd edilib.

“Unikal” xəbər verir ki, Abşeron Rayon İcra Hakimiyyətinin başçısı Abdin Fərzəliyev, RİH-nin məsul əməkdaşları, hüquq-mühafizə orqanlarının rəhbərləri, YAP Abşeron Rayon Təşkilatının sədri, şəhid ailələri və qazilərlə birgə şəhidlərimizin məzarlarını ziyarət edib.

Abşeron Rayon İcra Hakimiyyəti başçısı ölkəmizdə, o cümlədən Abşeron rayonunda şəhid ailələrinə və qazilərə böyük diqqət və qayğı göstərildiyini, onların xatirəsinin əbədiləşdirilməsi, xatirələrinin daim yaşadılması istiqamətində müxtəlif tədbirlər həyata keçirildiyini vurğulayıb.
Ətraflı

RİH-nin başçısı daha sonra şəhidlərimizin əvvəllər yaşadığı evlərinə gedərək ailələri ilə görüşüb, qayğıları ilə maraqlanıb. O cümlədən, Masazır kəndində tibb xidməti leytenantı şəhid Xəlilbəyli Turqut Nadir oğlunun xatirəsinin əbədiləşdirilməsi məqsədi ilə inşa olunan abidə-bulaq kompleksini ziyarət edib.

Eyni zamanda Abşeron RİH-nin məsul əməkdaşları tərəfindən Vətən müharibəsi qəhrəmanları Elburus Bayramovun, Rəşad Abdullayevin, Valeh Bədəlovun və Şahin Allahyarovun, o cümlədən şəhidlərimiz Oruc Vəliyevin, Ülvi Rəhimlinin, Xalid Mecdinovun, İsmayıl Kərimovun, İlqar Bürcəliyevin ailələri ziyarət edilib.

Bildirilib ki, 44 günlük Vətən müharibəsi şəhidlərinin ailələrinə, qazilərinə Abşeron rayonunda da daim yüksək həssaslıqla yanaşılır. Onların mənzil-məişət şəraitlərinin yaxşılaşdırılması, işlə təmin olunmaları və rastlaşdıqları digər məsələlərin operativ surətdə həll olunması daim Rayon İcra Hakimiyyəti tərəfindən nəzarətdə saxlanılır.