Milli Məclisin deputatı Ağalar Vəliyevin təşəbbüsü ilə Goranboy rayonunda Ulu Öndər Heydər Əliyevin Anım Günü münasibətilə mərasim təşkil olunub.

"Unikal" xəbər verir ki, 97 saylı Goranboy-Ağdam-Tərtər  Seçki Dairəsindən Milli Məclisin deputatı Ağalar Vəliyevin təşəbbüsü və İcra Hakimiyyəti ilə birgə təşkilatçılığı ilə Goranboy rayonunda Ümummilli Lider Heydər Əliyevin anım günü münasibətilə mərasim təşkil olunub.

Tədbirdən əvvəl Ulu Öndərin rayon mərkəzindəki abidəsi ziyarət olunub, əziz xatirəsi böyük ehtiramla yad edilib və abidəsi önünə tər gül-çiçək dəstələri qoyulub.

Rayon icra hakimiyyətinin başçısı Məhərrəm Quliyevin, hüquq-mühafizə orqanlarının rəhbərlərinin, şəhid ailələrinin, qazilərin və ictimaiyyətin nümayəndələrinin iştirakı ilə keçən mərasimdə Heydər Əliyevin Azərbaycanın çağdaş tarixindəki misilsiz xidmətləri xüsusi vurğulanıb.

Qeyd olunub ki, respublikaya rəhbərlik etdiyi bütün dönəmlərdə Ümummilli Lider xilaskarlıq və dövləti inkişaf yoluna çıxarmaq missiyasını layiqincə yerinə yetirib, onun uzaqgörən və məqsədyönlü siyasəti sayəsində müstəqilliyimizin dönməzliyi təmin edilib və Azərbaycan böyük intibah yoluna qədəm qoyub.

Bildirilib ki, Heydər Əliyevin ən böyük missiyalarından və müstəsna xidmətlərindən biri də əsasını qoyduğu hərtərəfli milli  intibahı  özündən sonra inamla davam etdirə biləcək layiqli  varisini yetişdirməsi idi.

Bu gün Prezident İlham Əliyev tərəfindən Ulu Öndərin sosial-iqtisadi inkişaf kursu qloballaşan dünyanın tələblərinə uyğun uğurla davam etdirilir və müasir həyatımızın bütün sahələrində yüksək nailiyyətlər qazanılır.

Müstəqilliyinin ən qüdrətli dövrünü yaşayan Azərbaycan Müzəffər Ali Baş Komandanın rəhbərliyi ilə qalib dövlət və xalq olaraq şanlı Zəfərimizdən və Böyük Qayıdışımızdan irəli gələn yeni hədəflərin müəyyənləşdiyi bir dönəmdədir.

Mərasimdə bildirilib ki, dövlətçilik salnaməmizə adını qızıl hərflərlə yazan və bütün dünyada Azərbaycanın rəmzi kimi qəbul edilən Heydər Əliyevin əziz xatirəsini xalqımız həmişə uca tutur.

Prezident İlham Əliyevin müvafiq Sərəncamına əsasən, 2023-cü il “Heydər Əliyev İli” elan edilib və gələn il dahi şəxsiyyətin 100 illik yubileyi böyük təntənə ilə qeyd olunacaq. Sərəncamda vurğulandığı kimi, müstəqil Azərbaycan Ulu Öndərin indiki və gələcək nəsillərə əmanəti, onun zəngin və çoxşaxəli irsi isə xalqımızın milli sərvətidir.