"Azərbaycan Respublikasının İran İslam Respublikasının paytaxtı Tehranda yerləşən səfirliyinə silahlı terror hücumu olub. Nəticədə səfirliyin təhlükəsizlik xidmətinin rəhbəri Orxan Əsgərov qətlə yetirilib, iki nəfər digər əməkdaş isə yaralanıb. Allahdan şəhidimizə rəhmət diləyir, yaralılarımıza tezliklə sağalmağı arzulayıram".

Bunu "Unikal"a açıqlamasında Milli Məclisin vitse-spikeri Adil Əliyev deyib. Onun sözlərinə görə, terror hadisəsinin baş verdiyi anın təhlükəsizlik kameralarına düşmüş kadrlardan göründüyü kimi hücumu törədən fiziki cəhətdən cüssəli, davranış baxımından isə hazırlıqlı və soyuqqanlıdır:

"Bu isə hücumun təsadüfi və ya şəxsi xarakterli deyil, məhz əvvəlcədən planlaşdırılmış terror hadisəsi olduğun qənaətinə gəlməyə əsas verir. İran hüquq mühafizə orqanları hücum edən şəxsin iki uşağı ilə səfirliyə girdiyini bəyan etsə də, kadrlardan göründüyü kimi orada heç bir uşaq yoxdur. Hadisə qurbanlarının sayı daha çox bilərdi. Yalnız səfirliyimizin təhlükəsizlik xidməti əməkdaşının sayıqlığı, fədakarlıq və qəhrəmanlığı sayəsində terror qurbanlarının sayı daha da artmayıb".

A.Əliyev bildirib ki, Vyana Konvensiyasına əsasən, İran İslam Respublikası səfirliyimizin təhlükəsizliyinə məsuliyyət daşıyır: "Amma İran hökuməti bu vəzifəsini yerinə yetirməyib və yaxud yerinə yetirmək istəməyib. Amma İran heç olmasa hadisənin istintaqını obyektiv surətdə araşdırmalı, terror əməlinin arxasında dayananların aşkar edilib cəzalandırılmasını təmin etməlidir. Bizi bunu İrandan tələb edirik. Əks təqdirdə, İranın Ermənistanla daha bir ortaq xüsusiyyəti təsbit olunacaq: bu xüsusiyyət terrora dəstək vermək mahiyyətidir. Çoxdandır ki, İrandakı terrorçulardan bizə qarşı təhdidlər eşidilirdi. Buna görə də İran hakimiyyətin və müvafiq orqanlarının bu terror hadisəsinin baş verəcəyindən əvvəlcədən xəbərdar olmadıqlarına inanmaq çətindir. Amma hətta fərz etsək onların bundan əvvəlcədən xəbəri olmayıb, o halda belə, İran hökumətinin, rəsmi dairələrinin və mətbuatının Azərbaycana qarşı apardığı geniş böhtan və düşmənçilik kampaniyasını, eləcə də nifrət çıxışlarını nəzərə aldıqda, İran bu hadisəyə görə ən azından mənəvi məsuliyyət və cavabdehlik daşıyır. İran nə beynəlxalq hüquqa, nə də  etikaya sığmayan bu davranışlarına son qoymalı, dinc və normal qonşuluq münasibətlərinə qayıtmalıdır. Qonşu ölkəyə nifrət və düşmənçilik təbliğ etməkdənsə, öz daxili problemlərinə diqqətini yönəltməli və İranda tüğyan edən etirazlara daha həssas yanaşmalıdır".