Mənimsəmədə təqsirləndirilən Auditorlar Palatasının Maliyyə və Texniki təminat şöbəsinin sabiq müdiri Vəli Rəhimovun, mühasib-maliyyəçi Gövhər Əhmədovanın və auditor Fəridə Novruzovanın cinayət işi üzrə məhkəmənin hazırlıq iclası keçirilib.

"Unikal" xəbər verir ki, Bakı Ağır Cinayətlər Məhkəməsində keçirilən iclasda A.Rəhimov və Novruzovanın müdafiəçiləri cinayət işinin ibtidai istintaq mərhələsinə qaytarılmasını istədiklərini bildiriblər.

R.Rəhimovun vəkili Faiq Nəcəfov ibtidai istintaqın düzgün aparılmadığını, ittihamın bir nəfərin ifadəsi əsasında olduğunu bildirib:

“Gövxar Əhmədovanın ifadəsində Vəli Rəhimovun göstərişini yerinə yetirdiyi qeyd olunub. Bunun üçün əlavə dəlil yoxdur. Araşdırma zamanı bank kartları yoxlanılıb və çıxarışlar götürülüb. Lakin bu oxunuşlar təsdiqlənməyib. Söhbət Gövhər Əhmədovanın üç övladının bank kartlarından gedir. Hər üçü analarının kartlardan pul çıxardığını iddia edib. Amma açıqlamalardan aydın olur ki, Türkiyədə bu kartlar mağazalarda malların, restoranlarda hesabların ödənilməsində istifadə olunub. Əhmədovanın üçüncü övladı banka gedib və kartdan 18 min manat çıxarıb. Hər kəs yalnız öz əməlinə görə mühakimə olunmalıdır”.

Vəkil onu da qeyd edib ki, Əhmədova 2020-ci ildə oğlunun şəhid olması xəbərindən çox pis təsirlənib.

Fəridə Novruzovanın vəkili Əli Həsrətov məhkəmədən həmkarının vəsatətinin təmin olunmasını istəyib. O, Əhmədovanın övladlarının işin iştirakçısı olduğunu bildirib və müvəkkilinin aldadılıb istintaq sənədlərinə imza atdığını bildirib.

Gövhər Əhmədovanın vəkili Pəhləvan Aslanov isə cinayət işinin ibtidai istintaqa qaytarılmasına etiraz edib. Bildirib ki, cinayət işi kifayət qədər ciddi qurumda - Korrupsiyaya Qarşı Mübarizə İdarəsində aparılır. Onun sözlərinə görə, müvəkkilinin övladlarına qarşı irəli sürülən ittihamların heç bir əsası yoxdur.

Prokuror Orxan Kəngərli də məhkəmədən vəsatətin təmin edilməməsini istəyib. Məhkəmə bunu iclasdan sonra təmin edib. 

Növbəti iclas yanvarın 26-na təyin edilib.

Qeyd edək ki, Azərbaycan Auditorlar Palatası bu işdə zərərçəkmiş tərəf kimi tanınır. Cinayət işi üzrə dəymiş ziyanın 700 min manata yaxın olduğu iddia edilir.