"Məhbus Mixail Saakaşvilinin əfv edilməsi ilə bağlı qərar dövlət başçısının mənəvi məsuliyyətidir və buna heç kim təsir edə bilməz".

"Unikal" xəbər verir ki, bunu Gürcüstan prezidenti Salome Zurabaşvili deyib. 

“Mən bu məsələyə münasibət bildirmirəm. Bu, özüm verəcəyim və buna görə özümə cavabdeh olacağım mənəvi bir qərardır. Bu, xarici və ya daxili təzyiqin təsir edə biləcəyi məsələ deyil”, - Zurabişvili bildirib.

O, ölkədə azad və ədalətli parlament seçkilərinin keçirilməsinin eks-prezidentin əfv olunub-olunmamasından asılı olmadığını vurğulayıb. Onun sözlərinə görə, o, real səbəblərdən həbsdədir.

“Bu o demək deyil ki, biz humanitar perspektivi nəzərə almamalı və ona hörmət etməməliyik. Həbsxanada onun başına gələnləri çox diqqətlə izləyirdim. Nə etmək olar deyə soruşduqda mən razıyam ki, reputasiya baxımından onun başqa yerdə olması daha yaxşı olardı”, - Gürcüstan Prezidenti qeyd edib.

Zurabişvili həmçinin bildirib ki, “başqa ölkələrin istifadə etdiyi bir çox imkanlar var”. Söhbət ekstradisiyadan və ev dustaqlığından gedir. O, Ukraynanın Saakaşvilini ekstradisiya etməyə hazır olduğunu xatırladıb.

Xatırladaq ki, Mixail Saakaşvili ona qarşı bir sıra cinayət işlərinin olmasına baxmayaraq, 2021-ci ilin oktyabrında vətəninə qayıdıb. Nəticədə Gürcüstanın eks-prezidenti həbs edilib. Saakaşvili özü həbsini siyasiləşmiş adlandırıb və aclıq aksiyasına başlayıb. Sonradan eks-prezidentin səhhəti ciddi şəkildə pisləşib, 2022-ci ilin mayında müayinə olunmaq üçün həbsxanadan paytaxtdakı klinikaya köçürülüb. Vəziyyətinə baxmayaraq, o, Gürcüstan siyasətində iştirak etməyə hazır olduğunu dəfələrlə bəyan edib.

Gülayə Mecid