Respublikaçılar Partiyasının namizədi və Ağ Evin keçmiş rəhbəri (2017-2021) ABŞ prezident seçkilərində yenidən qalib gəlib.

"Unikal" xəbər verir ki, Bu barədə “Reuters” Nümayəndələr Palatasının spikeri Mayk Consona istinadən məlumat yayıb.

Bir çox seçici Trampın prezidentliyini uğurlu lider kimi (pandemiya və böhrana baxmayaraq) xatırlayır. Əksinə, hazırkı dövlət başçısı Co Bayden miqrasiya böhranı və artan inflyasiyaya görə tənqid olunur. Bundan əlavə, Trampın hətta mübahisəli bəyanatlarını belə qəbul etməyə hazır olan çoxlu sadiq tərəfdarları var. 2020-ci il seçkilərində uduzduqdan sonra dövlət çevrilişinə cəhd etməsi ilə bağlı ittihamlar Trampın yenidən prezidentliyə qayıtmasına mane olmayıb. Və 2024-cü ilin iyulunda Ağ Evin keçmiş rəhbərinə qarşı sui-qəsd siyasətçinin reytinqlərdəki mövqeyini daha da gücləndirib. 

Seçki kampaniyası zamanı Tramp orduya xərcləri artıracağını, vergiləri azaldacağını və mallara idxal rüsumlarının artırılması hesabına büdcəni dolduracağını vəd edib. Respublikaçı həm də aborta federal qadağa ilə bağlı qanun layihəsini imzalamaq niyyətində deyil, hesab edir ki, ştatların bu məsələni özləri həll etmək hüququ var. Tramp ilk prezidentliyi dövründə inşasına başlanan Meksika ilə sərhəddə divarı tamamlamaq və ABŞ tarixində qeyri-qanuni miqrantların deportasiyası üçün ən böyük əməliyyatı həyata keçirmək istəyir. O, həmçinin viza alanlar üçün “sağlam ideoloji yoxlamanın” tərəfdarıdır və cinayətlərə görə vətəndaşlığı ləğv etmək istəyir. Xarici siyasətdə Tramp NATO müttəfiqlərini müdafiəyə “çox az” xərclədiklərinə görə tənqid edir. Siyasətçi hətta andiçmə mərasimindən əvvəl də Ukraynada hərbi əməliyyatlara son qoyacağını dəfələrlə bəyan edib və Kiyevə hərbi dəstəyin zəruriliyini şübhə altına alıb. Respublikaçı ABŞ-nin rəqibi hesab etdiyi Çin və İran məsələsində demokratlardan daha sərt mövqedədir.

Gülayə Mecid