Dekabrın 18-də Dövlət İmtahan Mərkəzi (DİM) qiymətləndirmə fəaliyyəti ilə məşğul olmaq istəyən şəxslər üçün test imtahanı keçirəcək.

Mərkəzdən "Unikal"a bildirilib ki, imtahan vermək üçün 173 namizəd qeydiyyatdan keçib.

DİM-in elektron imtahanlar korpusunda (Bakı şəhəri, Binəqədi rayonu, S.S.Axundov, 50) keçiriləcək imtahan saat 15:00-da başlanacaq və bir saat davam edəcək. Saat 14:45-dən sonra gələn namizədlər imtahana buraxılmayacaq.

İmtahan vermək üçün qeydiyyatdan keçmiş namizədlər DİM-in internet saytına daxil olaraq imtahana buraxılış vərəqəsini çap edə bilərlər. Buraxılış vərəqəsində imtahan yeri, imtahana gəlməli olan vaxt və digər zəruri məlumatlar göstərilib.

Namizədlər imtahana gələrkən şəxsiyyəti təsdiq edən sənədin əsli, buraxılış vərəqəsi və kalkulyator gətirməlidirlər.

İmtahan 9 istiqamət üzrə keçirilir. Namizədlərə müvafiq istiqamət üzrə 30 test tapşırığı təqdim olunur. Test tapşırıqlarının düzgün cavabları 1, 2 və ya 3 balla qiymətləndirilir. İmtahanda toplanılması mümkün olan ümumi (maksimal) bal 60-dır. 30 bal və daha çox nəticə əldə etmiş namizəd imtahandan müvəffəqiyyətlə keçmiş hesab olunur.