"Barselona"nın baş məşqçisi Hans-Diter Flik İspaniya kubokunun yarımfinalının cavab oyununda "Atletiko"nu üstələyərək (1:0, ilk oyun - 4:4) finala yüksəlməklərindən danışıb.

"Unikal" xəbər verir ki, Kataloniya təmsilçisi həlledici matçda əzəli rəqibi "Real Madrid"lə qarşılaşacaq.

Hans-Diter Flik isə hələlik bu görüş haqqında düşünmədiklərini bildirib: "Yaxşı müdafiə olunduq və çox yaxşı oynadıq. Hər kəs bu komanda ilə fəxr edə bilər. "Atletiko" böyük klubdur. Lakin biz daha yaxşı çıxış etdik. 

Qarşıda bizi La Liqada “Real Betis”lə oyun gözləyir. Növbəti görüşlərin hamısı çətin olacaq. Amma bizim fantastik komandamız var. "Real"la final oyunundan danışmaq istəmirəm. Bütün diqqətimi "Betis"lə matça yönəltmişəm. "El-Klassiko" oynamaq əladır, amma qarşıda hələ çox matç var. Final indi heç bir əhəmiyyət kəsb etmir".

Qeyd edək ki, "Barselona" və "Real" arasındakı final matçı aprelin 26-da keçiriləcək.