ABŞ artıq Rusiya və Ukrayna arasında danışıqlarda vasitəçi rolunu oynamayacaq.

"Unikal" xəbər verir ki, bunu Dövlət Departamentinin sözçüsü Temmi Bryus bildirib.

Onun sözlərinə görə, Moskva və Kiyev arasında birbaşa danışıqların vaxtı çatıb.

"Bizim bu məsələyə yanaşma tərzimiz və metodologiyamız dəyişir. Biz vasitəçi olmayacağıq. Biz mötədil görüşlər üçün dünyanın yarısına uçmayacağıq. Bu, indi iki tərəf arasında görülməli olan bir işdir. Bunun vaxtıdır", - deyə Bryus bildirib.  

Dövlət Departamentinin sözçüsü əlavə edib ki, Birləşmiş Ştatlar hələ də sülhün əldə edilməsinə kömək etmək üçün “əlindən gələn hər şeyi edəcək”, lakin onların fikrincə, münaqişənin nəticəsi indi Ukrayna və Rusiyadan “konkret ideyaların işlənib hazırlanmasını” tələb edir.

"Dünyanın başqa hissələri, bütün Yer kürəsi var. Onlar da bizim diqqətimizi tələb edir", - deyə o əlavə edib.

Bundan əlavə, Bryus ABŞ-nin Rusiyaya qarşı hazırda mövcud olan sanksiyaları ləğv etməyəcəyini vurğulayıb.