Aniterror əməliyyatı zamanı yaralanan qazi İsax Bəşirov pensiyasının kəsilməsindən şikayətçidir.

"Unikal"ın məlumatına görə, o bildirib ki, hərbi əməliyyatlar zamanı 3 güllə yarası alıb və daxili orqanlarına ciddi ziyan dəyib. Bir neçə dəfə əməliyyat olunub. Əməliyyatlar zamanı ona sonsuzluq diaqnozu qoyulub:

"Mənə bir illik əlillik verildi. Daha sonra isə əlilliyimi ləğv etdilər, pensiyamı kəsdilər. Atamın 62 yaşı var, ağır xəstədir. Mən də artıq pensiya almıram. 

Mən gələcəkdə ailə başçısı və övlad sahibi ola bilməyəcəm. Gələcəyimi Vətənə qurban verdim, amma onlar mənim pensiyamı kəsdilər, əlilliyimi ləğv etdilər", - deyə qazimiz qeyd edib.

Məsələ ilə bağlı Dövlət Tibbi-Sosial Ekspertiza və Reabilitasiya Agentliyinə sorğu ünvanladıq. Agentliyin İctimaiyyətlə əlaqələr və daxili kommunikasiyalar şöbəsinin müdiri Tural Qurbanov sorğumuza cavabında bildirdi ki, Kəlbəcər sakini 2004-cü il təvəllüdlü Bəşirov İsax Sabir oğluna təyin olunan əlillik müddəti 31.03.2025-ci il tarixdə başa çatsa da,  onun əlilliyinin yenidən qiymətləndirilməsi ilə bağlı heç bir müraciəti olmayıb: "Bunun üçün vətəndaş  qeydiyyatda olduğu poliklinikaya müraciət etməlidir. Tibb müəssisəsi tərəfindən şəxslə bağlı  yenidən müvafiq sənədlər (forma-88) e-sistemə göndərilməlidir ki, əlilliyinin qiymətləndirilməsi aparıla bilsin.

Göndəriş daxil edildiyi halda qanunvericiliyə uyğun olaraq İsax Bəşirovun əlilliyinin təkrar qiymətləndirilməsi aparılacaq", - deyə məlumatda bildirilib.

Anar Kəlbiyev