Səudiyyə Ərəbistanında inşası davam edən "Jeddah Tower" adlı nəhəng göydələnin 2028-ci ilin avqustunda tamamilə istifadəyə verilməsi planlaşdırılır.

"Unikal" xəbər verir ki, bu  barədə xarici KİV məlumat yayıb. 

Amerikalı memar Adrian Smitin rəhbərlik etdiyi "Adrian Smith + Gordon Gill Architecture" (AS+GG) şirkəti tərəfindən hazırlanan layihə tamamlandıqdan sonra, "Jeddah Tower" hazırda dünyanın ən hündür binası olan Dubaydakı "Burj Khalifa"nı da geridə qoyacaq. Binanın hündürlüyü 1000 metrdən çox olacaq ki, bu da "Burj Khalifa"dan təxminən 173 metr yüksəkdir.

Memarların açıqlamasına görə, 2025-ci ilin iyuluna qədər tikinti 69-cu mərtəbəyə çatıb və beton işlərinin yarısı tamamlanıb.

"Jeddah Tower" çoxfunksiyalı olacaq – burada lüks hotel, ofislər, mənzillər, kondominiumlar və dünyanın ən yüksək 157-ci mərtəbəsində müşahidə meydançası yerləşəcək. Həmçinin bina “dünyanın ən müasir lift sistemlərindən birinə” sahib olacaq: ümumilikdə 59 lift, o cümlədən beş iki mərtəbəli lift quraşdırılacaq.  

Qeyd edək ki, tikintiyə 2013-cü ildə başlanılıb, lakin COVID-19 pandemiyası səbəbindən işlər bir neçə il dayanmışdı. Rəsmi olaraq bərpa işləri yalnız 2025-ci ilin yanvarında davam etdirilib.

Layihənin dəqiq dəyəri açıqlanmır, lakin şirkətin saytında məlumat verilir ki, təxmini qiymət 1,2 milyard dollardır.