Generaldan sərt açıqlama
Generaldan sərt açıqlama
"Cəzaçəkmə müəssisələrində oğru ideyalarının inkişaf etməsinə icazə vermirik"

"Azərbaycanda üç cəzaçəkmə müəssisəsi tikilib, yeddisi də tikilir. Bir neçə gün qabaq Brüssel şəhərində beynəlxalq müşavirədə oldum. Orda da bunu dedim. Digər ölkələrin cəzaçəkmə müəssisələrinin rəhbərləri təəccübləndilər ki, heç bir yerdə məhkumlara bu cür qayğı göstərilmir".Bunu Penitensiar xidmətin rəisi Mədət Quliyev bildirib.Məhkumların saxlanılma şəraitinin yaxşılaşdırılması istiqamətində atılan addımlar barədə danışan xidmət rəisi qadınlar üçün cəzaçəkmə müəssisəsinin tikintisinin davam etdiyini deyib: "Sabunçu rayonunda aparılan tikinti işləri davam etdirilir. Bu yaxınlarda işlərin başa çatması gözlənilir".
Cəzaçəkmə müəssisələrində qanuni oğruların söz sahibi olması barədə iddialara münasibət bildirən Penitensiar xidmətin rəisi deyib ki, bu iddialar həqiqətə uyğun deyil: "Hər bir jurnalistə böyük hörmətlə yanaşıram amma olur ki, bəzi jurnalistlər tərəfindən həqiqətə uyğun olmayan məqalələr yazılır. Cinayətkar aləmə yaxın olan məhkumlar müəyyən addımlar atmaq istəyirlər, bu proses də keçmiş sovet ölkələrində 20-ci əsrin əvvəllərindən vardı. Amma ona görə də cəzaçəkmə müəssisələrində Pentensiar xidmətin əməkdaşları lazımi preventiv addımları atır. Cəzaçəkmə müəssisələrində oğru ideyalarının inkişaf etməyinə qətiyyən icazə vermirik. Ümumiyyətlə, hər bir məhkuma dövlətimiz tərəfindən xüsusi qayğı var və onun nəticəsidir ki, seçkilərdə də məhkumların 97 faizi iştirak etdi və onların 91 faizi İlham Əliyevə səs verdi. Dünən Əli İnsanovun vəkili də mətbuata demişdi ki, onun saxlama şəraitindən heç bir narazılığı yoxdur"Penitensiar xidmətin rəisi, ədliyyə general-leytenantı Mədət Quliyev Penitensiar xidmətin Müalicə müəssisəsinin narkologiya və terapiya korpusunda baş verən yanğının səbəbini açıqlayıb. M.Quliyev bildirib ki, yanğına səbəb tibb bacısının ehtiyatsızlığı olub. Onun sözlərinə görə, tibb bacısı "Tefal" markalı su qızdırıcısını elektrik şəbəkəsinə qoşulu vəziyyətdə qoyduğu üçün qısaqapanmadan yanğın baş verib. O bildirib ki, xidmətin əməkdaşları qısa zamanda səfərbər olduğundan yanğının qarşısını ala biliblər və müəssisədə müalicə alan məhbusların heç biri xəsarət almayıb.
Fuad